Mektep oqýshylaryn jappaı gınekologtardyń tekserisinen ótkizýdi áli de talqylaý qajet - Asylova
ASTANA. QazAqpara - Bilim jáne ǵylym mınıstrligi balalarǵa qatysty jynystyq qylmystardy anyqtaý maqsatynda ustazdardyń psıxologııalyq daıyndyǵy kúsheıtýdi kózdeıdi. Al mektep oqýshylaryn jappaı gınekologktardyń teksersininen ótkizý máselesin áli de talqylaý qajet, dep xabarlaıdy QazAqparat tilshisi.
«Qazirgi josparǵa sáıkes, biz psıxolog ustazdardyń sanyn kóbeıtetin bolamyz. Máselen, 2015-2016 oqý jylynda 2 638 psıxolog pen áleýmettik pedagog biliktilikti kóterý kýrstarynan, sondaı-aq 6 902 medıtsına qyzmetkeri psıxologııalyq daıyndyqtan ótti. Jalpy, biz osy baǵytta jumys istep jatyrmyz. Negizi, biz daıyndyq baǵdarlamalarynyń barlyǵyn qaıta qarap shyǵýymyz qajet. Budan bólek, psıxolog ustazdardyń ózderin qaıta daıarlap, olardyń sanyn arttyrý boıynsha josparlar bar. Osy saladaǵy jumys jalǵasa beredi. Oǵan qajetti qarajat ta bar», - deıdi Bilim jáne ǵylym vıtse-mınıstri B.Asylova.
Aıta keteıik, kúni keshe Bas prokýratýrada balalardy zorlaý máselesine qatysty jıyn ótti. Onda Bas prokýrordyń orynbasary Andreı Kravchenko jynystyq qylmystyń qurbanyna aınalǵan balalardy birden anyqtaý maqsatynda mektep muǵalimderiniń psıxologııalyq daıyndyǵyn kúsheıtý qajettigin jetkizdi. Sondaı-aq ol mektepte ótkiziletin medıtsınalyq tekseristerge gınekolog mamandar da atsalysýy qajet dep sanaıdy. Sebebi jynystyq zorlyqtyń qurbanyna aınalǵan balalar kóp jaǵdaıda ol qylmystar týraly ashyq aıtýǵa qorqady. Bilim jáne ǵylym vıtse-mınıstri Bıbigúl Asylovanyń oıynsha, ustazdardyń psıxologııalyq daıyndyǵyn arttyrý qajet. Alaıda medıtsınalyq tekseristerge gınekolog pen xırýrgtardy qosý máselesin áli te talqyǵa salǵan jón.
«Endi, ondaı tekserister ata-ananyń qatysýymen ótedi. Ol mindetti túrde. Degenmen, kishkentaı balalardy gınekologtardyń tekserý máselesin áli de talqylaý qajet. Qoǵamnyń talqysyna salǵan jón. Ata-analar óz kózqarasyn aıtýy kerek. Bul bastamanyń quqyqtyq tártibin zerdeleıik. Álemdiń tájirıbe bar. Osynyń bárin eskere otyryp, naqty sheshim jasaýǵa bolady», - deıdi vıtse-mınıstr Asylova.
