Mektep oqýshylaryn vaktsınatsııalaý júrgizilip jatqan joq - DSM

NUR-SULTAN. QazAqparat – Mektep oqýshylaryn koronavırýsqa qarsy vaktsınatsııalaý júrgizilip jatqan joq. Bul týraly QR DSM Qoǵamdyq densaýlyq saqtaý ulttyq ortalyǵynyń basqarma tóraǵasynyń orynbasary Aınagúl Qýatbaeva aıtty, dep habarlaıdy QazAqparat tilshisi.

Búgin Ortalyq kommýnıkatsııalar qyzmetinde ótken baspasóz máslıhatyna qatysqan Densaýlyq saqtaý mınıstrliginiń ókilderine: «Áleýmettik jelide balalardy mektepke vaktsına salý úshin shaqyryp jatyr. Sondyqtan balalaryńyzdy mektepke jibermeńizder» degen maǵynada habarlama júrgendigi aıtylyp, munyń qanshalyqty ras ekendigi suralǵan bolatyn.

«Áleýmettik jelide mundaı aqparat tarap otyr. Halyq arasynda ártúrli sózge ılanyp, bizge habarlasyp jatqan ata-analar da bar. Eń aldymen biriktirilgen, bir qutyda, bir shprıtste koronavırýs juqpasyna jáne tumaýǵa qarsy vaktsınany eshkim oılap tapqan joq. Ondaı vaktsına múldem óndirilmegen. Mundaı vaktsına oılap tabylatyn bolsa, onda bul árıne medıtsına salasyndaǵy sensatsııa bolar edi», - dedi ol.

Onyń atap ótýinshe, elimizde 18 jasqa deıingi balalarǵa vaktsınatsııa olardyń ata-anasynyń kelisimen ǵana salynady.

«Osyǵan oraı, mektep aıasynda qandaı da bir vaktsına salynatyn bolsa, onda ata-analar jınalysy ótkiziledi. Búginde mektepterge vaktsınatsııa júrgizilip jatqan joq», - dedi Aınagúl Qýatbaeva.