Mektep oqýshylaryn tamaqtandyrýǵa qatysty baıqaý komıssııalarynyń 43 múshesi jazaǵa tartyldy - Almaty
ALMATY. QazAqparat - Almaty qalasynyń Túrkisib aýdandyq bilim bólimi mektep oqýshylaryn tamaqtandyrýǵa qatysty satyp alý sharalaryn júrgizetin baıqaý komıssııalarynyń 43 múshesin tártiptik jaýapkershilikke tartty.
Bul týraly búgin Almaty qalalyq prokýratýrasynyń baspasóz qyzmetinen habarlady.
Bul sheshim Túrkisib aýdandyq prokýratýrasynyń qadaǵalaý aktisiniń negizinde jasaldy.
Ústimizdegi jyly naýryz aıynda tıisti zańnamaǵa engizilgen ózgeristerge sáıkes, mektep oqýshylaryn tamaqtandyrýǵa qatysty qyzmetterdi satyp alý sharasy memlekettik satyp alý salasynan shyǵarylyp, mektepterdiń ózderine júktelgen bolatyn.
Osyǵan baılanysty Almaty qalasynyń Túrkisib aýdandyq prokýratýrasy tıisti tekserý júrgizgen edi. Belgili bolǵanyndaı, aýdandaǵy barlyq orta bilim beretin mektepterdiń satyp alý komıssııalarynyń quramyna sanıtarlyq-epıdemııalogııalyq qyzmetterdiń ókilderi endirilmegen.
Ol azdaı, satyp alýdy uıymdastyrýshylar as máziriniń tizimin ázirlemegen jáne ol týraly sanıtarlyq-epıemııalogııalyq qyzmettiń kelisimin de almaǵan. Bul mindetti olar qyzmet kórsetýshilerdiń ózderine júkteı salǵan.
Ókiletti memlekettik organnyń satyp alý sharalaryna qatysýdan jáne as mázirin maquldaýdan shettetilýi zańǵa qaıshy. Bul osy aýdanda bilim alyp jatqan 10 278 mektep oqýshysynyń densaýlyǵyna keri áserin tıgizýi múmkin.
Osylaısha, prokýrorlyq qadaǵalaý aktisiniń negizinde aýdandyq bilim bóliminiń sheshimimen baıqaý komıssııalarynyń 43 múshesi tártiptik jaýapkershilikke tartyldy.
