Mektep oqýshylary jumys dápterin satyp alýǵa mindetti me
ASTANA. QazAqparat - QR Bilim jáne ǵylym vıtse-mınıstri Asxat Aımaǵambetov bastaýysh synyptarda jumys dápterin satyp alýǵa qatysty túsinik berdi, dep xabarlaıdy QazAqparat tilshisi.
«Jumys dápterin paıdalaný mindetti shara emes. Sondyqtan ata-analardy ony satyp alýǵa mindetteýge bolmaıdy. Bul - qosymsha materıal. Sondyqtan ony satyp alý, ıa satyp almaý - árbir adamnyń óz erki. Satyp alamyn dese, qoldanýǵa bolady. Biraq bizdiń ustanymymyz ózgergen joq. Jumys dápteri mindetti materıal emes. Bireýler ony satyp alýǵa mindettese, biz tıisti sharalardy qoldanamyz. Sebebi jumys dápterin talap etý zańsyz», - dedi A.Aımaǵambetov Úkimet úıinde ótken baspasóz máslıxatynda.
Onyń aıtýynsha, mınıstrlik arnaıy xatynda jumys dápterin qoldanýǵa qatysty tolyq ınstrýktsııany joldaǵan bolatyn. Alaıda barlyq mektepterde ony qoldanyp jatqan joq. Osyǵan baılanysty aldaǵy Tamyz konferentsııasy kezinde osy másele taǵy kóteriledi. Negizgi maqsat - jumys dápterin mindettemeýdi barlyq muǵalimderge jetkizý.
«Jumys dápterinen bólek xrestomatııa da bolady. Keıbir synyptarda basqa da materıaldar bar. Bunyń barlyǵyn ata-analar óz erkimen alady. Máselen, mektep oqýshylarynyń sómkeleri aýyr deımiz. Sebebi oqýlyqpen birge jumys dápteri de satylady. Ondaı dápterler keı kezde oqýlyqpen birdeı bolady. Osyǵan baılanysty dál qazir biz Densaýlyq saqtaý mınıstrligimen birge jumys dápterleri boıynsha biryńǵaı talaptardy ázirlep jatyr. Áıtpese, keıbir dápterlerdiń salmaǵy kitaptan da aýyr», - dep atap aıtty A.Aımaǵambetov.
