Mektep oqýshylary óksheli aıaq kıim kııýi kerek - Bas sanıtar

NUR-SULTAN. QazAqparat - QR DSM Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary - QR Bas memlekettik sanıtary Jandarbek Bekshın balalardy jańa oqý jylyna daıyndaý týraly keńes berdi, dep habarlaıdy QazAqparat tilshisi.

Ásirese bas sanıtar mektep formasyn, aıaq kıim men oqýshylar sómkesin durys tańdaýdyń mańyzyn túsindirdi.

«Mektepke qajetti qural-jabdyqtar balanyń densaýlyǵyna tikeleı áser etedi. Ondaǵy forma bala denesiniń dem alýy úshin jáne allergııalyq reaktsııa týdyrmaý úshin tabıǵı talshyqtardan (jún, maqta, zyǵyr, jibek) jasalǵan matalardan tigilýi kerek. Negizgi talapqa sáıkes, tabıǵı talshyqtar úlesi formanyń syrtynda - 35%, ishki jaǵynda - 100% kem bolmaýy tıis», - dedi J. Bekshın Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, bas sanıtar balalarǵa óksheli aıaq kıim alyp berýdi usyndy.

«Tabıǵı bylǵarydan jasalǵan aıaq kıimderdi tańdaǵan jón. Kúndelikti kııýge krossovkı, kedy áperýge bolmaıdy. Bastaýysh synyp oqýshylary úshin ortopedııalyq taban, joǵary synyp oqýshylary úshin - 4 sm aspaıtyn ókshe qajet. Sebebi, ókshesiz aıaq kıimdi únemi kıgennen túıetaban, omyrtqaaralyq jaryq paıda bolýy múmkin», - dedi ol.

Ásirese, sporttyq aıak kıimdi balanyń beıinine qaraı tańdaý kerek. Eger ol jeńil atletıkamen aınalyssa - dóńes bop tigilgen aıaq kıim yńǵaıly. Eger tennıspen aınalyssa - aıaq kıim tegis bolýy kerek.