Mektep oqýshylary Qazaqstan tarıhyn endi QR Ulttyq mýzeıinde oqı alady

NUR-SULTAN. QazAqparat - Mektep oqýshylary Qazaqstan tarıhyn endi QR Ulttyq mýzeıinde oqı alady. Búgin Mádenıet jáne sport mınıstri Dáýren Abaev «Mýzeıdegi oqý kúni» atty jańa mádenı-bilim berý jobasynyń bastalǵany týraly habarlady.

Sabaqtyń taqyryby men mazmuny oqý baǵdarlamasyna tolyq sáıkes keledi, dep habarlaıdy QazAqparat QR Mádenıet jáne sport mınıstrliginiń baspasóz qyzmetine silteme jasap.

Joba 5-9 synyp oqýshylarynyń qoǵamdyq-gýmanıtarlyq pánder boıynsha teorııalyq bilimderin bekitýge baǵyttalǵan.

«Balalar tól tarıhymyzdy mýzeı eksponattarynyń kómegimen zertteıtin bolady, bul balalar úshin de, pedagogter úshin de tamasha múmkindik. Zertteýshi ǵalymdar, QR Ulttyq mýzeıiniń ekskýrsııa jetekshileri orta mekteptiń tarıh pániniń muǵalimderimen birlesip, geımıfıkatsııa elementterin qoldana otyryp, ınteraktıvti sabaqtar ótkizedi. Sabaq barysynda oqýshylar eksponattarmen jaqynyraq tanysyp, artefaktilerdiń kóshirmelerin qolda ustaı alady», - dep atap ótti QR Mádenıet jáne sport mınıstri Dáýren Abaev.

Sabaqtar mýzeıdiń ekspozıtsııa zaldarynda ótedi. Bir dáristiń uzaqtyǵy 35-45 mınýtty quraıdy. Elimizdiń basqa qalalarynyń oqýshylary úshin mýzeı sabaqtary jaqyn arada onlaın formatta qoljetimdi bolady. Ol úshin mýzeı qyzmetkerleri vıdeo sabaqtar daıyndaǵan.

Aıta keteıik, joba «Balalar jyly» aıasynda júzege asyp otyr.