Mektep oqýshylary energııa únemdeý salasyndaǵy ózderiniń jobalaryn júzege asyrý úshin granttar alady
ASTANA. QazAqparat - Birqatar úkimettik emes uıymdar mektep oqýshylarynyń "jasyl" ekonomıka salasynda jasaǵan shaǵyn jobalaryna granttar bólmek. Mundaı jobalar búgin Astanadaǵy Táýelsizdik saraıynda kórmege qoıyldy.
Konkýrsqa qatysý úshin Aqmola oblysynyń joǵarǵy synyp oqýshylary men kolledj stýdenterinen 50 shaqty ótinish kelip túsken. Olardyń 21-i aqtyq synǵa ótken. Kórmeniń nátıjesi boıynsha qorytyndy shyǵarylyp, jeńimpazdar 180 myń teńge kólemindegi grantqa ıe bolady. Granttardyń jalpy sany 12 dep belgilengen. «Balalardyń aldynda óz dúnıetanymyn keńeıtip, ǵylymmen tereńdep aınalysýǵa múmkinshilik bar. Bizdi balalardyń alǵan bilimin osylaısha is júzinde qoldanyp, mynadaı jobalar jasaı alatyny qýantady», - dep atap ótti «Jasyl ekonomıka» jáne G-Global-dy damytý úshin» birlestiginiń basqarma tóraıymy Saltanat Raqymbekova.
