Mektep oqýshylary bırjada saýda-sattyq júrgizýdi úırenedi
ASTANA. QazAqparat - Atalǵan bastama «Kásipkerlik jáne bıznes negizderi» atty jańa pándi mektep baǵdarlamasyna engizý aıasynda qolǵa alynady. 11-synyp oqýshylaryna vırtýaldy valıýtalar beriledi. Onymen qundy qaǵazdarmen saýda-sattyq júrgizýge bolady. Qazirgi kezde ondaı tájirıbe stýdentter arasynda keńinen taraǵan, dep xabarlaıdy QazAqparat tilshisi.
«2008 jyly biz alǵash ret bırjalyq sımýlıatory shyǵardyq. Sonyń arqasynda stýdentter alǵan bilimderin tájirıbe júzinde iske asyra alady. 9 jyldyń ishinde 14,5 myńǵa jýyq adam osy jobaǵa qatysty. Biz olarǵa vırtýaldy aqshany beremiz. Stýdentter sol aqshamen qundy qaǵazdardy ózara saýdalaıdy, ózara jarysady, básekege túsedi. Reıtıngte birinshi orynǵa shyǵýǵa tyrysady. Bári ınteraktıvti rejımde júredi. Basqa joǵary oqý oryndarynyń stýdentterimen jarysýǵa da bolady. Sońǵy eki jylda bıznes mektepter osy júıege qatysýǵa nıet tanytyp otyr. Endi, jańa pánniń aıasynda biz mektep oqýshylaryn da qosýǵa daıynbyz», - deıdi KASE ókili Evgenıı Muxamedjanov.
Jańa pánniń oqý baǵdarlamasyn daıarlaý tobynyń ókili Ermek Dúısenxanovtyń aıtýynsha, «Kásipkerlik jáne bıznes negizderin» úıretý aıasynda mektep oqýshylary úshin onlaın jáne offlaın oıyndar daıarlanady. Sonyń biri - 11-synyp oqýshylaryna arnalǵan KASE-tiń oıyn sımýlıatory. Bırjanyń saýda-sattyǵyna úshinshi toqsanda oqytý josparlanyp otyr.
Aıta keteıik, kelesi jyldan bastap 10-11 synyp oqýshylary úshin «Kásipkerlik jáne bıznes negizderi» atty pán engiziledi .
«Atameken» palatasy jańa pán oqýlyǵyn birlesip ázirleýge úndedi.
