Mektep oqýshylaryna kún saıyn 2 saǵat dene tárbıesi sabaǵy engizildi — sheteldegi qazaq baspasózi
ASTANA. KAZINFORM — Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstanda jasandy jańbyr jaýdyrý boıynsha pılottyq joba jasalady — ÓzA
Ózbekstanda jasandy jańbyr jaýdyrý tehnologııasyn ǵylymı negizde ázirleý jáne pılottyq jobany iske qosý josparlanyp otyr. Bul 2026 jylǵa arnalǵan memlekettik baǵdarlamada kórsetilgen. Joba boıynsha jumystar 2026 jyldyń 1 naýryzynan bastalady.
Bul týraly osy aptada «ÓzA» aqparat agenttigi málimdegen bolatyn.
Habarlamada aıtylýynsha, atalǵan jobany ázirleý barysynda bul baǵytta álemniń jetekshi elderi sanalatyn Frantsııa, Qytaı jáne Saýd Arabııasy tájirıbesi zerdelenetin bolady.
Sonymen qatar qujatqa sáıkes, joba iske qosylǵannan keıin jaýyn-shashyn kólemi tabıǵı jaǵdaımen salystyrǵanda 10–20 paıyzǵa deıin artýy múmkin.
— Jarlyqta sý resýrstaryn utymdy paıdalaný jáne qolda bar qorlardy únemdeý máselesine erekshe nazar aýdarylǵan. Atap aıtqanda, úsh jyl ishinde 10 myń shaqyrym ashyq drenaj júıesin jabyq júıege kóshirý josparlanyp otyr, dep jazady «ÓzA».
Aıta keteıik, baǵdarlama aıasynda 504 myń gektar jerge sý únemdeıtin tehnologııalardy engizý kózdelgen. Nátıjesinde 5 mıllıard tekshe metr sý únemdeledi dep kútilýde.
Sondaı-aq «ÓzA»-da «Túrki elderi saýda boıynsha yntymaqtastyq memorandýmyna qol qoıdy» degen taqyryptaǵy aqparat jarııalandy.
Atalǵan BAQ-tyń dereginshe, Túrki memleketteri uıymyna múshe elder saýda salasyndaǵy yntymaqtastyq jónindegi birlesken kommıýnıke men ózara túsinistik týraly memorandýmǵa qol qoıdy.
Osyǵan qatysty Túrki memleketteri uıymy (TMU) Ekonomıka jáne saýda mınıstrleriniń 14-otyrysy Túrkistan qalasynda ótti.
Jıynda kópjaqty saýda men ınvestıtsııany damytý, tsıfrlyq transformatsııa, kólik jáne logıstıka, sondaı-aq Orta dálizdiń tıimdiligin arttyrý máseleleri talqylandy.
Qazaqstan ǵylymı belsendilik boıynsha joǵary orynda tur — Eurasia Today
Qazaqstan Ortalyq Azııa elderi arasynda ǵylymı belsendilik boıynsha SCImago Country Rank halyqaralyq reıtınginde birinshi oryn aldy, dep habarlady Eurasia Today.
Atalǵan basylymnyń Qazaqstan Respýblıkasy Ǵylym jáne joǵary bilim mınıstrliginiń baspasóz ortalyǵyna silteme jasap habarlaýy boıynsha, Qazaqstan SCImago Research Group halyqaralyq ǵylymı belsendilik reıtınginde Ortalyq Azııa elderi arasynda birinshi oryndy ıelenip, aımaqtaǵy jetekshi ornyn taǵy aıqyndady.
Keltirilgen derekterge súıensek, Qazaqstan 1996-2024 jyldar aralyǵyndaǵy derek boıynsha álemdik tizimde 69-orynǵa turaqtasa, 2024 jyldyń qorytyndysy boıynsha 64-orynǵa joǵarylady.
Qazaqstannyń kórsetkishi Ortalyq Azııa elderinen edáýir joǵary. Ózbekstan 83-shi, Qyrǵyzstan 130-shy, Tájikstan 147-shy, al Túrkimenstan 191-shy orynda tur. Bul aıyrmashylyq ǵylymdy qarjylandyrý deńgeıi, zertteý ınfraqurylymynyń damýy, kadrlyq áleýet, halyqaralyq yntymaqtastyq jáne jarııalanym sapasy sekildi negizgi kórsetkishterdegi basymdyqty bildiredi.
Iran aqyndarynyń 100 shyǵarmasy qyrǵyz tilinde jarııalanady — ParsToday
Irannyń mádenı ortalyǵy jáne Qyrǵyzstan Jazýshylar odaǵymen birlesip, ırandyq aqyndardyń 100 shyǵarmasynyń qyrǵyz tilinde jarııalanýy eki halyq arasyndaǵy mádenı jáne ádebı dıplomatııany nyǵaıtýdaǵy jańa qadam bolyp tabylady, dep jazdy ParsToday aqparat agenttigi.
ParsToday-dyń IRNA agenttigine silteme jasap habarlaýynsha, Qyrǵyzstandaǵy Irannyń mádenı keńesshisi Abdolreza Seıfı men Qyrǵyzstan Jazýshylar odaǵynyń tóraǵasy Kanybek Imanalıev Bishkekte ótken kezdesý barysynda eki tarap ádebı yntymaqtastyqty damytýǵa jáne Iran aqyndarynyń 100 shyǵarmasyn qyrǵyz tilinde jarııalaýǵa kelisken. Bul kelisimge sáıkes, shyǵarmalardyń parsy tilindegi mátinin Irannyń mádenı keńesshisi qamtamasyz etedi, al aýdarma men basyp shyǵarý protsesin Qyrǵyzstan Jazýshylar odaǵy júzege asyrady. Osylaısha qyrǵyz aýdıtorııasy qazirgi zamanǵy Iran ádebıetimen jaqsyraq tanysatyn bolady.
Irannyń mádenı keńesshisi Abdolreza Seıfı ortaq mádenı múmkindikterdi atap ótti.
Onyń aıtýynsha, ádebıet — ulttardyń ortaq tili, al ırandyq aqyndardyń 100 shyǵarmasyn qyrǵyz tilinde jarııalaý Tegeran men Bishkek arasyndaǵy mádenı baılanystardy tereńdete alady.
Qyrǵyzstan Jazýshylar odaǵy basshysy da bul jospardy quptap, ony eki jaqtyń da kitap salasyndaǵy jazýshylary men belsendileri arasyndaǵy ózara árekettesýdi keńeıtýge arnalǵan platforma dep atady.
Sondaı-aq álemdik is-sharamen birge mádenı dıplomatııany nyǵaıtý týraly sóz bolǵan.
1200 jyldyq kamfora aǵashy órtten zardap shekti — Jenmın jıbao
Hýnan ólkesiniń Daýshıan aýdany aýmaǵynda shamamen 1200 jyldyq baıyrǵy kamfora aǵashy órtten zardap shekti. Oqıǵa 9 aqpanda bolǵan. Bul týraly osy aptada jergilikti orman sharýashylyǵy basqarmasyna silteme jasap Jenmın jıbao habarlaıdy.
Vedomstvo málimetinshe, azamat jasyna tolmaǵan eki bala aǵash dińiniń qýysyna pırotehnıkalyq buıymdardy laqtyryp, sonyń saldarynan aǵash ishinen órt tutanǵan. Aǵashtyń bıiktigi shamamen 20 metr, dińiniń jýandyǵy 3,2 metr bolǵan. Dińi men iri butaqtarynyń ózegi keýektenip, maılylyǵy joǵary bolǵandyqtan, órt oshaǵy kómeski kúıde uzaq saqtalyp, tolyq sóndirý jumystary 7 saǵatqa sozylǵan.
Mamandardyń saraptamasyna sáıkes, órt barysynda aǵashtyń ishki shirigen bóligi kúıgenimen, qabyǵy men talshyqty qabaty negizinen saqtalǵan. Sondyqtan aǵash tolyq qýrap ketpeýi múmkin.
Qytaılyq basylymnyń málimetinshe, qazirgi ýaqytta jergilikti orman sharýashylyǵy organdary aǵashty qalpyna keltirý jáne kútim jumystaryn júrgizip jatyr. Sonymen qatar oqıǵaǵa qatysty tulǵalardy jaýapkershilikke tartý úshin tekserý bastalǵan.
Aıta keteıik, osyǵan uqsas jaǵdaılar boıynsha buǵan deıin de jaýapkershilik júktelgen. Máselen, 2025 jylǵy 27 qańtarda pırotehnıkalyq buıymdardy paıdalanýdan shyqqan órt saldarynan turǵyn úıge zııan keltirilgen is boıynsha sot ata-anasyn 330 myń ıýannan astam ótemaqy tóleýge mindettegen. Al 2024 jylǵy 12 aqpanda Gýandýn ólkesiniń Meıchjoý qalasynda jasóspirimderdiń áreketinen orman órti shyǵyp, qamqorshylaryna ormandy qalpyna keltirý shyǵyny men aıyppul tóleý júktelgen.
Quzyrly organdar ata-analardy balalarǵa pırotehnıkalyq buıymdardy qaýipsiz paıdalaný talaptaryn túsindirýge shaqyrdy.
Orta jáne bastaýysh synyp oqýshylaryna kún saıyn 2 saǵat dene tárbıesi sabaǵy engizildi — CNR
Barlyq óńirlerde orta jáne bastaýysh synyp oqýshylaryna kún saıyn 2 saǵat dene tárbıesi sabaǵy jáne sabaq arasyndaǵy 15 mınýttyq úzilis belgilendi, dep habarlaıdy Qytaıdyń «Ortalyq halyq radıosyn».
Qytaılyq basylymnyń 25 aqpanda Oqý-aǵartý mınıstrligi málimetine súıenip habarlaýynsha, atalǵan shara oqýshylardyń densaýlyǵyn nyǵaıtý jáne qozǵalys belsendiligin arttyrý maqsatynda engizilgen.
Mınıstrlik deregine sáıkes, 2024 jyly el kóleminde oqýshylardyń dene daıyndyǵy men densaýlyq kórsetkishterin keshendi tekserý nátıjesinde joǵary, orta jáne bastaýysh synyp oqýshylarynyń jalpy dene sapasynyń jaqsy deńgeıi 2016 jylmen salystyrǵanda 9,3 paıyzǵa artqany anyqtalǵan.
FIFA bıletteri qyryq esege deıin joǵary baǵamen satylýda — TRT
2026 jylǵy álem chempıonatynyń bıletteriniń baǵasy FIFA-nyń resmı qaıta satý platformasynda 143 750 dollarǵa deıin kóterildi.
2026 jylǵy álem chempıonatynyń bıletteri FIFA-nyń resmı qaıta satý platformasynda qymbattady, negizgi satý kezeńi qańtar aıynda aıaqtalyp, bıletterdiń kóbi jańadan taratylǵanyna qaramastan, kóptegen matchqa arnalǵan oryn óz qunynan birneshe ese joǵary baǵamen tizimge engizildi, dep habarlaıdy Túrkııa Radıo Televızııa portaly.
Atalǵan BAQ-tyń málimetinshe, FIFA prezıdenti Djannı Infantıno bıletterdiń qaıta satý saıttarynda shamadan tys baǵamen satylýy múmkin ekenin eskertkennen birneshe apta ótken soń bul alańdaýshylyqtar álem fýtbol uıymynyń óz platformasynda shyndyqqa aınaldy.
Aıta ketý kerek, sársenbi kúngi derek boıynsha, 11 maýsymda Mehıkodaǵy «Atsteka» stadıonynda ótetin Meksıka men Ońtústik Afrıka arasyndaǵy ashylý matchy úshin «úshinshi sanattaǵy» oryn 5 324 dollar bolyp kórsetildi, dál sol bıletterdiń bastapqy baǵasy 895 dollar edi.