Mektep oqýshylaryna aptasyna 2 ret jylqy eti beriledi
ASTANA. KAZINFORM — Mektep ashanasy mázirine jylqy eti qosyldy. Bul týraly Májilis depýtattarynyń saýalyna Premer-mınıstrdiń orynbasary — Ulttyq ekonomıka mınıstri Serik Jumanǵarınniń jaýabynda aıtylǵan.
— Bilim berý mekemelerinde tamaqtanýdy uıymdastyrýǵa qoıylatyn talaptardy sáıkestendirý maqsatynda osy jyldyń 1 qyrkúıeginen bastap jalpy tamaqtaný standarty engizildi. Ony ázirleý kezinde salaýatty dıetany qalyptastyrýdyń halyqaralyq tásilderi jáne semizdik, qant dıabeti, júrek-qan tamyrlary jáne basqa da aýrýlardyń damý qaýpin azaıtýǵa baǵyttalǵan Dúnıejúzilik densaýlyq saqtaý uıymynyń usynystary eskerildi, — dedi vıtse-premer.
Onyń aıtýynsha, standartta kókónister men jemisterdiń úlesin arttyrý, tabıǵı emes ónimder men tuz ben qant mólsheri joǵary taǵamdardy alyp tastaý, qant qosylǵan sýsyndar men shyryndardyń ornyna aýyz sý retinde gazdalmaǵan sý, sút, ashytylǵan sút ónimderi, jemis shaılary jáne qant mólsheri az sýsyndar qarastyrylǵan.
— Sonymen qatar, standart eki portsııa kóleminde aptasyna eki ret jylqy etin qosýdy usynady. Uıymdardaǵy tutyný tártibi, sondaı-aq tamaq ónimderin saqtaýǵa, daıyndaýǵa, tasymaldaýǵa jáne ótkizýge qoıylatyn talaptar saqtalǵan jaǵdaıda, et taǵamdarynyń barlyq túrinde jylqy etin paıdalanýǵa shekteý kózdelmegen densaýlyq saqtaý salasyndaǵy ýákiletti organnyń sanıtarııalyq qaǵıdalarymen retteledi. Osylaısha, uıymdarda tamaqtanýdy júzege asyratyn qurylymdar tolyqqandy jáne alýan túrli dıetany, aımaqtyq azyq-túlik artyqshylyqtaryn, azyq-túlik taýarlarynyń qoljetimdiligin, ulttyq dástúrlerdi jáne salaýatty tamaqtaný salasyndaǵy halyqaralyq usynystardy eskere otyryp, mázirdi derbes qalyptastyrý quqyǵyna ıe, — dedi Serik Jumanǵarın.
Aıta keteıik, elimizde tegin ystyq tamaqpen 1,7 mln mektep oqýshysy qamtylǵan. Olardyń ishinde 1,4 mln astamy bastaýysh synyp oqýshysy jáne 340 myńnan astamy áleýmettik osal sanattaǵy otbasylardyń balalary bar.