Mektep oqýlyqtaryn shyǵaratyn bilikti mamandar tapshy - QR BǴM
ASTANA. QazAqparat - Qazaqstanda mektep oqýlyqtaryn shyǵarýmen aınalysatyn bilikti mamandar tapshylyǵy baıqalady. Búgin Májiliste «Oqýlyqtardyń sapasy jáne jalpy orta, tehnıkalyq jáne kásiptik bilim berý uıymdaryn oqýlyqtarmen qamtamasyz etý» atty taqyryptaǵy Úkimet saǵatynda Bilim jáne ǵylym mınıstri Aslan Sárinjipov osylaı málimdedi.
Mınıstrdiń sózine qaraǵanda, qazirgi tańda oqýlyq sapasyna birden bir áser etetin faktor sarapshylar men oqýlyq daıyndaýshylardyń biliktiligi bolyp tabylady. «Osyǵan oraı, oqýlyq avtorlary men sarapshylardyń sapalylyq quramyna júrgizilgen taldaýlar elimizde tıisti biliktiligi men tájirıbesi bar mamandardyń tapshylyǵyn kórsetip otyr. Sonymen qatar oqýlyq jazatyn avtorlyq korpýstyń «qartaıýy» da baıqalýda», - dedi Aslan Sárinjipov. Mınıstrdiń sózine qaraǵanda, osyndaı olqylyqtyń saldarynan oqýlyq jazatyn avtorlar quramy keıde osy salada jumys istemegen, oqýlyq materıaldaryn shyǵarýmen aınalyspaǵan mamandardan quralatyn jaǵdaılar da kezdesip jatady. Sondyqtan da vedomstvo basshylyǵy sheteldik mamandardy tarta otyryp, oqýlyq daıyndaıtyn mamandardyń biliktiligin arttyrý jumystaryn qolǵa alǵan.
