Mektep oqýlyqtary basyp shyǵarylmas buryn qoǵamdyq saraptaýdan ótedi - BǴM
ASTANA. QazAqparat - Qazaqstanda endi mektep oqýlyqtary basyp shyǵarylmas buryn qoǵamdyq saraptaýdan ótedi.
Bul týraly búgin Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstrligi Bilim berý jáne ǵylym salasyndaǵy baqylaý komıtetiniń tóraǵasy Saıat Núsipov málim etti. Brıfıngte óńirlerdegi mektepterdiń oqý jylyna daıyndyǵy týraly másele qaralǵan bolatyn.
Komıtet basshysynyń aıtýyna qaraǵanda, sońǵy ýaqytta mektep oqýlyqtarynyń sapasyna qatysty syn aıtý báseńsı bastady. Degenmen de, mektep oqýlyqtaryna saraptama júrgizýdiń tártibi birshama ózgeriske ushyraǵan.
«Oqýlyq saraptamasy úsh satydan ótedi. Birinshi ǵylymı saraptama, ekinshisi pedagogıkalyq, úshinshisi qoǵamdyq saraptama. Bundaǵy basty jańalyq: qoǵamdyq saraptama bizdiń saıt arqyly tikeleı avtorızatsııalanǵan qoǵam ókilderimen júrgiziledi. Bul úshin oqýlyqtyń jobasy nemese tolyq maketi elektrondyq túrde usynylyp, onyń saraptamasy úshin qoljetimdilik tutastaı qamtylady. Osy ýaqyt aralyǵynda tıisti saıtta avtorızatsııalanǵan barlyq sarapshylar áli baspaǵa túspegen, mınıstrlik bekitpegen oqýlyq jobasymen tanysyp, eskertýleri bolsa jasap shyǵady. Osylaısha, bizdiń oqýlyqtarymyzdyń sapasyna qatysty eshqandaı da syn bolmasy úshin biz qoǵamdyq sarapshylardyń keń aýqymyn tartýdy kózdep otyrmyz», - dedi komıtet tóraǵasy S. Núsipov.
