Mektep oqýlyqtary básekelestik jaǵdaıynda paıdalanylatyn bolady - BǴM
ASTANA. 20 qarasha. QazAqparat -Mektep oqýlyqtary básekelestik jaǵdaıynda paıdalanylatyn bolady. Bul týraly búgin QR Parlamenti Májilisiniń Áleýmettik-mádenı damý komıtetiniń keńeıtilgen otyrysynda elimizdiń bilim salasyn oqýlyqtarmen qamtamasyz etý máselesin talqylaý barysynda Bilim jáne ǵylym vıtse-mınıstri Murat Ábenov málim etti.
«Jańa erejege sáıkes, jalpy mektep oqýlyqtarynyń barlyǵy básekelestik túrinde paıdalanylatyn bolady. Burynǵydaı bir pán boıynsha bir ǵana kitap nemese qaptaǵan kóp kitap emes, 5 qana oqýlyq bolady. Sonyń ishinen tańdap alýǵa múmkindikter bolady. Tańdap alýdy árbir mektep ózderi júzege asyratyn bolady», - deıdi vıtse-mınıstr.
Vıtse-mınıstrdiń aıtýynsha, jańa erejeni qalyptastyrý barysynda oqýlyqtaný jáne oqý kitaptaryn basyp shyǵarý salasyndaǵy halyqaralyq tájirıbeler, onyń ishinde Anglııa, Avstrııa, Germanııa, Frantsııa tájirıbeleri zerdelengen. Sonymen qosa, aǵymdaǵy jyly «Bilim týraly» zańnyń jańa redaktsııada qabyldanýyna oraı oqýlyqtardy, oqý-ádistemelik keshender men quraldardy ázirleý, saraptaý, synaqtan ótkizý jáne monıtorıng júrgizý, basyp shyǵarý jónindegi jumystardy uıymdastyrýdyń jańa tártibi bekitilgen. Bul ereje boıynsha oqýlyq basylymyn synaqtan ótkizý jáne monıtorıngileý sekildi jańa úderisteri engizilgen.
