Mektep oqýlyqtarynan 700-den astam qate men kemshilik anyqtaldy – Aıda Balaeva
ASTANA. KAZINFORM – Oqý-aǵartý mınıstrligi mektep oqýlyqtaryn kezeń-kezeńimen jańartý josparyn bekitti.
Premer-mınıstrdiń orynbasary, Qazaqstan Respýblıkasynyń Mádenıet jáne aqparat mınıstri Aıda Balaeva qoldanystaǵy kitaptardan 700-den astam qate men kemshilikter (tehnıkalyq, stıldik, tarıhı jańsaq paıymdar, matematıkalyq qateler) tabylǵan, tipti keıbir basylymdar 9 jyl boıy ózgerissiz qoldanylyp kelgenin aıtty.
– Búginde qoldanystaǵy oqýlyqtar boıynsha ártúrli sıpattaǵy 700-den astam eskertpe men qate anyqtaldy. Olardyń qatarynda tehnıkalyq jáne stıldik kemshilikter, derektik qateler, mazmunǵa sáıkes kelmeıtin ıllıýstratsııalar, jekelegen materıaldardyń oqý baǵdarlamalarymen úılespeýi, sondaı-aq eskirgen ádis-tásilder men tujyrymdamalardyń qoldanylýy bar. Ásirese ulttyq mazmunǵa laıyqtap beıimdelmegen materıaldardyń paıdalanylýy, matematıka pánindegi qate anyqtamalar men esep shyǵarý joldary, oqý baǵdarlamasynda kózdelmegen shyǵarmalardyń engizilýi, sondaı-aq tarıhı oqıǵalarǵa qatysty jańsaq paıymdar erekshe alańdaýshylyq týǵyzyp otyr.
Bul rette qoldanystaǵy birqatar oqýlyq belgilengen jańartý merziminen áldeqaıda uzaq ýaqyt boıy qaıta qaralmaǵanyn da eskerý qajet. Jekelegen oqý basylymdary 9 jylǵa deıin mazmundyq turǵydan eleýli ózgerissiz qoldanylyp keledi. Mundaı jaǵdaıda oqýlyqtardy ýaqytyly jańartý – oqýshylardy sapaly, ózekti ári memlekettik bilim berý standarttaryna saı oqý materıaldarymen qamtamasyz etýdiń kezek kúttirmeıtin qajettiligi, - dedi Aıda Balaeva.
Sondaı-aq ol jańa jospar boıynsha 2026 jylǵy 30 tamyzǵa deıin 3 jáne 7-synyp oqýlyqtary, 2027 jylǵy 1 qańtarǵa deıin 4 jáne 9-synyp oqýlyqtary, al 2027 jylǵy 1 sáýirge deıin 8-synyp oqýlyqtary tolyq jańartylatynyn atap ótti.
– Mektep oqýlyqtarynyń sapasy jekelegen baspalardyń ǵana máselesi emes ekenin de atap ótkim keledi. Bul – eldegi bilim sapasyna, demek balalarymyzdyń keleshegine tikeleı yqpal etetin mańyzdy másele. Oqýlyq saraptamanyń formaldy talaptaryna ǵana saı bolyp qoımaı, memlekettiń, qoǵamnyń jáne bilim berý júıesiniń búgingi suranysyna tolyq jaýap berýi tıis.
Bul buryn atalǵan oqýlyqtardy maquldaǵan Pándik saraptama komıssııasy sheshimderiniń kúshi joıylady degen sóz emes. Áńgime túpki nátıje úshin ortaq jaýapkershilik týraly bolyp otyr. Bilim salasy formaldy kózqarasty kótermeıdi. Balanyń qolyna tıetin árbir oqýlyq sapaly, mazmuny dál, deregi shynaıy jáne ýaqyt talabyna saı bolýy kerek. Osyǵan baılanysty Oqý-aǵartý mınıstrligi oqýlyqtardy kezeń-kezeńimen jańartyp, mektepterdi jańa oqý basylymdarymen qamtamasyz etýdi josparlap otyr. Atap aıtqanda, 2026 jylǵy 30 tamyzǵa deıin 3 jáne 7-synyptarǵa arnalǵan oqýlyqtar, 2027 jylǵy 1 qańtarǵa deıin 4 jáne 9-synyp oqýlyqtary, al 2027 jylǵy 1 sáýirge deıin 8-synyp oqýlyqtary jańartylady.
Bizdiń basty maqsatymyz - Qazaqstandaǵy árbir mektepti zamanaýı, mazmuny muqııat saralanǵan, ózekti bilimge, «Adal azamat» biryńǵaı tárbıe baǵdarlamasynyń qundylyqtaryna jáne memlekettik basymdyqtarǵa negizdelgen sapaly oqýlyqtarmen qamtamasyz etý. Ata-analar da, ustazdar qaýymy da, jalpy qoǵam da bizden osy jaýapty jumysty sapaly ári júıeli atqarýdy kútedi, - dedi A. Balaeva.
Buǵan deıin habarlaǵanymyzdaı, oqýlyqtar Konstıtýtsııanyń jańa normalarymen tolyqty.
