Mektep muǵalimi tek 5 qujatty ǵana toltyrýǵa mindetti - BǴM
ASTANA. QazAqparat - Odan artyq salmaq salynsa, mektep basshylyǵynyń ústinen aryz túsirýge bolady, dep xabarlaıdy QazAqparat tilshisi.
QR Bilim jáne ǵylym vıtse-mınıstri Asxat Aımaǵambetovtyń aıtýynsha, atalǵan másele jıi kóteriledi. Sebebi muǵalimder qaǵazbasty jumystan bosamaıdy. Olardy kóptegen qujattardy toltyrýǵa mindetteıdi. "Osyǵan baılanysty bilim jáne ǵylym mınıstrligi bıyl arnaıy buıryq shyǵardy. Onda mektep muǵalimi toltyratyn qujattardyń naqty tizimi kórsetilgen. Bes qujat qana, ol - jýrnal, kúndelik, balalardy sýmatıvti-formatıvti baǵalaý, kúntizbelik jáne pándik jospar. Boldy. Muǵalim tek osy qujattardy ǵana toltyrýǵa mindetti. Basqasyna ýaqyt ketirýge mindetti emes", - dedi A.Aımaǵambetov.
Onyń aıtýynsha, muǵalimderdiń júktemesin odan artyq kóterýge bolmaıdy. Mektep basshylyǵy artyq jumys berse, aryz túsirýge bolady. "Bilimdi baqylaý departamentine xabarlasýǵa bolady. Ondaı departamentter barlyq oblystarda bar. Aryz tússe, tıisti sharalar qolǵa alynady", - dep atap kórsetti A.Aımaǵambetov.
Aıta keteıik, búgin Astanada Tamyz konferentsııasynyń plenarlyq májilisi ótti. Sol jerde mınıstr Erlan Saǵadıev joǵary oqý oryndaryna eskertý jasady. "Byltyr memlekettik granttardyń sany 10 myńǵa artty. Bıyl taǵy 20 myń grant bólindi. Demek, onymen birge joǵary oqý oryndarynyń jaýapkershiligi artady. Biz bilim sapasyna basa nazar aýdaramyz. Al bul máseleni qalaı qadaǵalaımyz? Birinshiden, jas mamandardyń jumysqa turý reıtıngi boıynsha árbir joǵary oqý ornynyń jumysyn baǵalaımyz. Eger atalǵan kórsetkish tómen bolsa, onda sol mamandyq boıynsha lıtsenzııany keri qaıtaratyn bolamyz. Bul - basty kórsetkish. Sebebi jumys naryǵynda árbir túlekke suranys bolýy qajet", - dep atap kórsetti E.Saǵadıev. Kolledjerge qatysty týra sondaı sharalar qoldanylady.
