Mektep muǵalimderiniń ortasha eńbekaqysy qansha

ALMATY. QazAqparat – Qazirgi ýaqytta mektepterdegi muǵalimderdiń ortasha jalaqysy – 343 myń teńge. 2023 jyldyń qańtarynda pedagogterdiń eńbekaqysy taǵy 25% ósedi. Bul týraly Almatydaǵy bilim forýmy barysynda mınıstr Ashat Aımaǵambetov málim etti, dep habarlaıdy QazAqparat tilshisi.

«2019 jyly elimizdegi ortasha jalaqy 168 myń teńge bolsa, orta bilim boıynsha ortasha jalaqy 115 myń teńge edi. Kórip otyrsyzdar, eldegi ortasha jalaqydan áldeqaıda tómen boldy. 2022 jyldyń ekinshi toqsanynda elimizdegi ortasha jalaqy 312 myń teńge bolsa, orta bilim deńgeıi boıynsha ortasha jalaqy 343 myń teńgege jetti. Demek, ortasha jalaqydan sál joǵary. Bul – Prezıdenttiń alǵa qoıǵan tapsyrmasy», - dedi ol.

Sondaı-aq, mınıstr kelesi jyly muǵalimderdiń eńbekaqysy ósetinin aıtty.

«2023 jyldyń qańtarynda jalaqy 25% ósedi. Tutastaı alǵanda, oqytýshynyń mártebesin kóterý jáne olardy ádetten tys qyzmetterge tartpaý, jaýapkershilikti azaıtý, jalaqyny kóbeıtý, ýnıversıtetterdiń akademııalyq erkindigi jáne pedagogıkalyq mamandyqtar boıynsha bitirýshilerdi attestattaý júıesi úılese otyryp, bizge qalaǵan nátıjeni alýǵa múmkindik beredi. Men bolashaqqa optımıstik kózqaraspen qaraımyn», - dedi Ashat Aımaǵambetov.