Mektep menedjmentin jaqsartýdyń bir joly - qaǵazbastylyqty azaıtý - O.Dármenov

Bul jaıynda búgin Ál-Farabı atyndaǵy Qazaq ulttyq ýnıversıteti «Qazaqstan Respýblıkasy Joǵary mektep menedjmentiniń qazirgi jaǵdaıy men máseleleri» atty dóńgelek ústel barysynda aıtyldy.

Atalǵan sharaǵa elimizdiń ár aımaǵynan kelgen joǵary oqý oryndarynyń ókilderi qatysyp, qazirgi joǵary oqý oryndaryndaǵy máseleler jáne joǵary oqý oryndaryn tıimdi basqarýdyń ádisi, joǵary oqý mekemelerin basqarýdyń jańa joly, joǵary mektep menedjmentiniń damý bolashaǵy jaıynda taqyryptar qozǵalyp, otandyq oqytýshy-professorlar ózara pikir almasty. Ál-Farabı atyndaǵy QazUÝ-dyń birinshi prorektory, jaqynda ǵana halyqaralyq deńgeıdegi oqytýshy qurmetti ataǵymen marapattalǵan professor Muhambetqalı Búrkitbaev ýnıversıtettiń menedjmenti týrasynda keńinen toqtalyp, otandyq áriptesterimen tájirıbe bólisti. «Elimizdegi joǵary oqý oryndarynyń kóshin bastap turǵan QazUÝ-da menedjment óte jaqsy damyǵan. Bizde ǵylymı keńes, aqparattyq tehnologııalar boıynsha keńes, qoǵammen baılanys keńesi sııaqty menedjment salasyn tıimdi atqarýǵa baǵyttalǵan birneshe keńester jumys isteıdi. Ár keńes jumysy menedjmenttiń tıimdi júrgizilýine yqpal etedi. Ýnıversıtet basshylyǵynyń talabyna saı ýnıversıtettegi ǵylymı zertteý ınstıtýttary, fakýltetter jáne kafedralardyń barlyǵy tıimdi jobalarmen arnaıy jumys istep, sheteldik áriptestikti damytýda. Ýnıversıtette Matrıchtik júıe qyzmet atqaryp keledi. Búginde Kaıdzen júıesin tájirıbege engizip otyrmyz. Bul júıeler Japonııada jáne taǵy da basqa sheteldik kompanııalarda, joǵary oqý oryndarda keńinen qoldanylady», - deıdi professor M.Búrkitbaev.

Sonymen qatar ol pánderdi aǵylshyn tilinde de ótkizý úderisin engizý - ulttyq zertteý ýnıversıtetine aınalýda joǵary kórsetkishke jeteleıtinin, ol úshin sheteldik ǵalymdardy shaqyrtýmen qosa, otandyq oqytýshylar da shet tilin erkin meńgerýi qajet ekendigin aıtyp ótti. Dóńgelek ústelde belgili bolǵandaı, túlekter de óz kezeginde ýnıversıtet menedjmenttiniń nátıjeli atqarylýyna tolaǵaı úles qosady. Batystyq, jalpy kásipkerlik psıhologııada túlek tek úzdik ýnıversıtetke, kásibılikke jetýine úlken baǵdar bergen bilim ordasyna ǵana qoldaý kórsetedi degen paıym bar eken. Bul oraıda, túlekter qory endaýment degen ataýǵa ıe. Al, endaýmenttiń jaqsy qyzmeti sol ýnıversıtet menedjmentiniń júıeliligin baıqatady.

Ǵalymdar joǵary oqý mekemeleriniń basqarýdyń jańasha túrin qarastyrý qajet ekendigin aıtty. S.Asfendııarov atyndaǵy Qazaq ulttyq medıtsınalyq akademııasy Úzdiksiz bilim berý ortalyǵynyń dırektory Oralbaı Dármenov menedjmenttiń durys bolýy bilim sapasynyń jaqsarýyna yqpal etetindigin aıtady. «Bilim sapasyn jaqsartý úshin ustazdardy, oqytýshylardy qaǵazbastylyqtan alystatý kerek. Mınıstrlikten keletin tekserister qaǵaz jumystaryn kóbeıtedi de, oqytýshyny alańdatyp, oqytý úderisindegi ýaqytyn zaıa ketiretini jasyryn emes. Oqytýshy esep-qısap, qaǵazben ýaqyt ketirgenshe, bilim, ǵylymǵa kóp ýaqyt bólýge mindetti. Endeshe menedjmentti jaqsartýdyń bir joly - osy qaǵazbastylyqty bir júıege keltirý kerek dep esepteımin», - degen oıyn jetkizdi. Professordyń aıtýynsha, joǵary oqý oryndary menedjmentiniń jaqsarýyna ýnıversıtettermen qatar mınıstrlik te tıimdi joldardy tájirıbege engizip otyrýy qajet.

Qazaqstan Respýblıkasy Joǵary mektep menedjmentiniń qazirgi jaǵdaıy men máseleleri barysynda ǵalymdar pikir almasqannan keıin Ál-Farabı atyndaǵy Qazaq ulttyq ýnıversıteti Biliktilikti arttyrý ınstıtýtynyń dırektory ýnıversıtette ótken «Joǵary mektep menedjmenti» kýrsynyń 2 toptaǵy birinshi tyńdaýshylaryna memlekettik úlgidegi kýálikter tabys etti. Kýrsqa elimizdiń ár óńirinen kelgen 27 tyńdaýshy qatysty.