Mektep mańynda baqylaý kúsheıedi: jańa oqý jylyna qandaı daıyndyq júrip jatyr
ASTANA. KAZINFORM — Jańa oqý jyly qarsańynda elimizde balalardyń qaýipsizdigin kúsheıtý sharalary qolǵa alyndy. Polıtsııa mektep mańyndaǵy joldar men jaıaý júrginshiler ótkelderin tekserip, patrýldik baǵyttardy bilim berý uıymdaryna jaqyndatady. Mektepterdegi dabyl túımeleri, beınebaqylaý jáne kirip-shyǵýdy baqylaý júıeleriniń jumysyna da erekshe nazar aýdarylady. Bul týraly QR ІІM Ákimshilik polıtsııa komıteti tóraǵasynyń orynbasary Quralaı Karına málimdedi.
Ortalyq kommýnıkatsııalar qyzmetinde ótken baspasóz máslıhatynda ol jańa oqý jyly qarsańynda balalardy qorǵaý baǵytynda atqarylyp jatqan jumystarǵa toqtaldy.
Onyń aıtýynsha, bul jumys «úı — mektep — úı» baǵytyn ǵana emes, bilim berý uıymdaryn, qoǵamdyq oryndar men ınternet keńistigin de qamtıdy.
Mektepke barar jolǵa baqylaý kúsheıedi
Oqý jyly bastalǵanda kóshede balalar kóbeıip, mektep mańyndaǵy kólik qozǵalysy artady. Sondyqtan sabaq bastalǵanǵa deıin polıtsııa bilim berý uıymdaryna jaqyn aýmaqtardy, kireberis joldar men jaıaý júrginshiler ótkelderin qarap shyǵady.
Jol belgileriniń, qorshaýlar men jaryqtandyrý júıesiniń jaǵdaıy, sondaı-aq jol qaýipsizdigine arnalǵan basqa da tehnıkalyq quraldardyń jaramdylyǵy tekseriledi.
Patrýldik baǵyttar mektepterge jaqyndatylyp, sabaq bastalatyn jáne aıaqtalatyn ýaqytta patrýldeý kúsheıtiledi.
Budan bólek, 15-30 tamyz aralyǵynda respýblıka boıynsha «Nazar aýdaryńyz, balalar!» aktsııasy ótip jatyr. Onyń maqsaty — quqyq buzýshylyqtar men túrli oqıǵalardyń aldyn alyp, balalardyń joldaǵy qaýipsizdigin qamtamasyz etý.
Quralaı Karına júrgizýshilerdi mektepter, jaıaý júrginshiler ótkelderi men balalar kóp jınalatyn oryndardyń mańynda barynsha saq bolýǵa shaqyrdy.
— Bala joldaǵy jaǵdaıdy durys baǵalamaýy múmkin. Sondyqtan júrgizýshi qaýipti aldyn ala boljap, jol-kólik oqıǵasyna jol bermeý úshin barlyq sharany qabyldaýy kerek, — dedi ol.
Mektepterdiń qaýipsizdik júıesi qalaı tekseriledi
Bilim berý uıymdarynda dabyl túımeleri, beınebaqylaý jáne kirip-shyǵýdy baqylaý quraldarynyń jumysy tekseriledi.
Sonymen qatar qaýip tóngende, kúdikti adam nemese zat baıqalǵanda qalaı áreket etý kerektigi pysyqtalady.
— Ár mektepke qaýipsizdikti qamtamasyz etýge jaýapty polıtsııa qyzmetkerleri men ishki ister organdarynyń qyzmet basshylary bekitilgen. Kámeletke tolmaǵandarmen, áleýmettik jaǵdaıy qıyn otbasylarmen jáne profılaktıkalyq esepte turǵan adamdarmen jumys ta kúsheıtilgen, — dedi Quralaı Karına.
Ata-analar neni eskerýi kerek
Quralaı Karınanyń aıtýynsha, balalardyń qaýipsizdigi kóp jaǵdaıda eresekterdiń qyraǵylyǵyna baılanysty. Sondyqtan ata-ana balasynyń qaıda jáne kimmen júrgenin bilip otyrǵany jón.
Balanyń minez-qulqyndaǵy ózgeristerdi de eleýsiz qaldyrmaǵan durys. Aqshasy nemese zattary sebepsiz joǵalsa, qorqynysh paıda bolyp, tuıyqtala bastasa nemese mektepke barǵysy kelmese, onyń sebebine mán berý qajet.
Balanyń ınternette kimmen sóılesip júrgenin de nazardan tys qaldyrmaǵan jón. Osyndaı jaǵdaılar baıqalsa, polıtsııaǵa dereý habarlaý qajet.
— Biz ata-analardyń alańdaýshylyǵyn túsinemiz jáne ony birge bólisemiz. Biz úshin ár balanyń ómiri, densaýlyǵy jáne bolashaǵy mańyzdy. Ony qorǵaý — ortaq mindet, — dedi Quralaı Karına.
Buǵan deıin ІІM jańa oqý jyly qarsańynda ata-analar men ustazdarǵa balalardyń qaýipsizdigine qatysty úndeý jasaǵanyn jazǵan edik.
