Mektep qurylysynda MJÁ tájirıbesi keńinen taratylady
NUR-SULTAN. QazAqparat - QR Premer-Mınıstri Asqar Mamın memlekettik-jekeshelik áriptestik (MJÁ) júıesin bilim salasynda keńinen paıdalanýdy júktedi, dep habarlaıdy QazAqparat tilshisi.
«Bilim berý salasy boıynsha balabaqshalardy oryndarmen qamtamasyz etý jónindegi «Balapan» baǵdarlamasy memlekettik-jekeshelik áriptestiginiń úzdik úlgileriniń biri dep aıtýǵa bolady. Búgingi tańda balabaqshalardaǵy oryndardyń 40 paıyzǵa jýyǵyn jeke sektor berip otyr, olarda 307 myńnan astam bala qamtylǵan. Balabaqshalar úshin jan basyna qaraı qarjylandyrý normatıvi bekitilgen, sondyqtan óńir ákimdikteri olardyń oryndalýyn qamtamasyz etý qajet», - dep tapsyrdy Asqar Mamın Úkimet otyrysynda.
Munymen qosa Úkimet basshysy mektepterdi salý kezinde memlekettik-jekemenshik áriptestik tájirıbesin keńinen taratý kerektigin júktedi. Osy oraıda barlyq tetikter men quraldar ázirlengen. Birqatar óńirde osy baǵytta tıimdi jumys atqarylýda.
«Sonymen birge, kásiptik-tehnıkalyq bilim berý júıesinde osyndaı jobalardy damytýdy bastaǵan jón. Qazirgi ýaqytta bul máseleler pysyqtalýda. Birlesken jobalardy damytý men basqarý boıynsha bıznes tarapynan úlken qyzyǵýshylyq bar jáne ony kórip otyrmyz. Jalpy, tehnıkalyq jáne kásiptik bilim berýdi odan ári damytý máselesi Úkimettiń aldaǵy otyrystarynyń birinde taǵy da jeke talqylaımyz», - dedi Premer-Mınıstr.
Budan buryn habarlanǵandaı, Úkimet otyrysynda memlekettik-jekeshelik áriptestik boıynsha jobalardyń quny 3 trln teńgege jýyqtaǵany aıtyldy.
