Mektep qurylysyna qarajat bala sanyna qaraı bólinedi
ASTANA. QazAqparat - 2020 jyly mektep qurylysy men kúrdeli jóndeý jumystaryn qarjylandyrýdyń jańa tásilderi engiziledi, dep habarlaıdy QazAqparat tilshisi.
Bul týraly QR Bilim jáne ǵylym mınıstri Erlan Saǵadıev Astanada mınıstrlik alqasynyń keńeıtilgen otyrysynda habarlady.
"Jyl saıyn memlekettik bıýdjetten mektep qurylysyna shamamen 60-70 mlrd teńge bólinedi. Alaıda, mekteptiń ornalasqan jeri, onyń eldi mekenge qajet bolýy, qurylys quny syndy birqatar ózekti máseleler bar. Uzaq talqylaýdan keıin 2020 jyldan bastap, qurylys pen kúrdeli jóndeýdi qarjylandyrýdyń jańa tásilderin engizýdi uıǵardyq. Sol 60 mlrd teńge endi balalar sanyna qaraı jalpy óńirge beriledi. Qarajatty alǵan óńir qaıda mektep salýdy, qaıda jóndeý júrgizýdi ózi sheshedi", - dedi E. Saǵadıev.
Mınıstr osylaısha bólingen qarjynyń tıimdi, jaýapty jumsalatynyn jáne baqylaýdyń artatynyn atap ótti.
"Sonymen birge, Dúnıejúzilik bank qarajaty arqyly aýyl mektepterine jabdyqtar satyp alamyz. Bul - óte úlken baǵdarlama jáne oǵan jete mán berý qajet", - dep óz sózin tolyqtyrdy mınıstr.
