Mektep qurylysyna bólingen 145 mlrd teńge qaıda
ASTANA. QazAqparat - Elimizdiń óńirilerinde salynýǵa tıis mektepterge bıýdjetten mıllıardtaǵan qarjy bólingen. Alaıda búginde qurylys jumystaryna 145 mlrd jetispeıtindigi anyqtalyp otyr, dep habarlaıdy QazAqparat tilshisi.
Májiliste «Nurly jol» baǵdarlamasy aıasynda salynýy tıis bilim nysandarynyń qurylysyna qatysty otyrys aldynda BAQ ókilderine suhbat bergen Májilis depýtaty Oleg Kazantsevtiń aıtýynsha, bes jyldyq kezeńde bilim berý nysandary, atap aıtqanda 175 balabaqsha men mektep qurylysy memleket tarapynan qarjylandyrylady. Atalǵan nysandar 2019 jyly tolyǵymen aıaqtalýy tıis.
«175 nysannan 19 balabaqsha paıdalanýǵa berildi. Al mektepterge qatysty jaǵdaı birshama túsiniksizdeý bolyp tur. ıAǵnı qurylystyń aıaqtalý merzimi osy jylǵa, 2019 jylǵa aýystyrylǵan nysandar bar. 4 mektep boıynsha mán-jaıdy anyqtaý ústindemiz, qazir olardyń qurylysy júrip jatyr. Problema konkýrstyq protsedýralardy jáne nysandardy tapsyrýdyń aralyq qorytyndylaryn der ýaqytynda rásimdemeýmen baılanysty. Sondyqtan bul rette jaǵdaıdy túzeýge bolady», - dedi ol.
Depýtattyń aıtýynsha, bilim nysandarynyń qurylysyna qatysty múldem túsiniksiz máseleler de bar. Máselen, Úkimet bekitip, nysandardyń qurylysy úshin óńirlerge bólingen 145 mlrd teńge tóńireginde qandaı da bir aıla-sharǵy oryn alǵan.
«Qazir Ulttyq qordan qarjylandyrý toqtatyldy. ıAǵnı barlyq mindettemeler oryndaldy. Alaıda bizde kóshpeli nysandary paıda bolyp otyr. 2019 jyly olar qaıdan qarjylandyrylatyndyǵy belgisiz. 2018 jylǵa da ázirshe naqty joba alyp otyrǵanymyz joq. Biz taıaý 2-3 apta ishinde bul protsessti talqylaımyz. Qarjy qaıda ketti, nelikten jetpeı qaldy, qosymsha qarjy qaıdan alynady degen máseleler qaralady»», - dedi Oleg Kazantsev.
