Mektep qurylysy úshin jerlerin bosatyp bergen zaǵıptar qoǵamyna jańa avtobýs satyp alyndy
PAVLODAR. KAZINFORM — «Qazaq zaǵıptar qoǵamy» qoǵamdyq birlestiginiń Pavlodardaǵy fılıalyna jańa jaıly avtobýs tabystaldy. Buǵan deıin jergilikti bılik kásiporyn qyzmetkerleriniń qala ishinde qatynaýy úshin kólikpen qamtamasyz etýge ýáde bergen bolatyn.
Oblys ákimi Asaıyn Baıhanov qoǵam qyzmetkerlerine 1200 oryndyq jańa mektep salý úshin jer ýchaskesin qalaǵa bergeni úshin alǵysyn bildirdi.
— Sizderdiń kásiporyn aýmaǵyn satyp alý máselesine túsinistikpen qaraǵandaryńyz oqýshy oryndarynyń tapshylyǵyn sheshýge kómektesedi. Bul úsh aýysymda oqýǵa májbúr bolǵan balalardyń bolashaǵy úshin óte mańyzdy. Biz muny baǵalaımyz jáne óz tarapymyzdan sizderge árqashan qajetti qoldaý kórsetýge daıynbyz. Bul avtobýstyń «Rýbıkom» kompanııasynyń demeýshiligimen satyp alynǵanyn atap ótken jón jáne kompanııanyń basshylyǵyna áleýmettik jaýapkershilik tanytqany úshin alǵysymdy bildiremin, — dedi óńir basshysy.
Pavlodardaǵy qazaq zaǵıptar qoǵamynyń qurylǵanyna 60 jyldan asty. Bir kezderi munda traktor zaýytyna arnalǵan bólshekter, kólik symdary jasaldy. Al qazir munda tósek-oryn, kıim, matratstar, qolǵaptar, súzgilerge arnalǵan tysqaptar tigiledi, aldaǵy ýaqytta jıhaz jasaý josparda bar.
Buǵan deıin Pavlodardaǵy jańa mektep zaǵıptar qoǵamy uıymynyń ornyna salynatynyn habarlaǵanbyz.
