Mektep kitaphanashylaryna pedagog mártebesi berilmek

ASTANA. KAZINFORM — Elimizde mektep kitaphanashylarynyń jalaqysyn kóterý úshin olarǵa pedagog mártebesin berý máselesi qarastyrylyp jatyr.

Oqý-aǵartý mınıstrliginiń dereginshe, respýblıkada 8 489 mektep kitaphanashysy bar.

Degenmen, salada bilikti mamant tapshylyǵy baıqalady.

Munyń ústine olardyń jalaqysy da birshama tómen. 

Aıtalyq, 3 jyldyq eńbek ótili bar kitaphanashynyń aılyǵy 105 208 myń teńgeni qurap otyr.

Salystyrmaly túrde aıtar bolsa, olar 2021 jyly ne bári 72 558, al 2022 jyly 89 246 teńge jalaqy alyp kelgen.

«Qazirgi ýaqytta „Memlekettik bilim berý uıymdary qyzmetkerleriniń úlgi shtattaryn bekitý týraly“ qaýlyda „pedagog-kitaphanashy“ laýazymy qarastyrylmaǵan. Soǵan baılanysty mektep kitaphanashylary „Pedagog mártebesi týraly“ zańda kózdelgen jeńildikter men qoldaýlardy ala almaıdy. Búginde mektep kitapahanashylaryna mártebe berý máselesi qarastyrylyp jatyr» delingen mınıstrliktiń agenttik saýalyna bergen jaýabynda. 

Vedomstvonyń atap ótýinshe, elimizdegi 7 089 mektebinde kitaphana bar, olardyń kitap qory — 137 mln dana.

Al Mádenıet jáne aqparat mınıstrligi usynǵan derekke sáıkes, respýblıkada 3 898 jalpyǵa qoljetimdi kitaphana, onyń ishinde respýblıkalyq mańyzy bar qalalarda 92 kitaphana bar.

Ótken jyly olardyń oqyrman sany 51,9 mln adamǵa jetti.