Mektep kitaphanashylary «pedagog» laýazymyna teńestirilýi múmkin

ASTANA. QazAqparat – Mektep kitaphanashylaryn «pedagog» laýazymyna teńestirý máselesi pysyqtalady. Bul týraly Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«Oqý-aǵartý mınıstrligi bıyl 2 165 orta bilim berý uıymy kitaphanashylarynyń biliktiligin arttyrý kýrstaryn ótkizýdi josparlap otyr. Kýrsta IT-quzyrettilik pen tsıfrlyq saýattylyq, avtorlyq quqyq, zamanaýı kitaphanashynyń Soft jáne Hard skills daǵdylary, kitaphanalardy áleýmettik jelilerde ilgeriletý, kitaphanadaǵy netvorkıng sııaqty keń aýqymdy taqyryptary qamtylǵan», - dep atap ótedi Tamara Dúısenova jaýabynda.

Onyń atap ótýinshe, memlekettik bilim berý uıymdary qyzmetkerleriniń úlgi shtattarynda «pedagog-kitaphanashy» laýazymy qarastyrylmaǵan.

«Qazaqstan Respýblıkasy Úkimetiniń 2008 jylǵy 30 qańtardaǵy № 77 «Memlekettik bilim berý uıymdary qyzmetkerleriniń úlgi shtattaryn bekitý týraly» qaýlysynda «Pedagog-kitaphanashy» laýazymy qarastyrylmaǵanyn eskere otyryp, bilim berý uıymdaryndaǵy kitaphanashylardy «pedagog» laýazymyna teńestirý máselesi jan-jaqty zerdelenip (qajettilik, laýazymdyq nusqaýlyq, jalaqy t.b.), pysyqtalatyn bolady. Júrgizilgen zertteýler nátıjesinde kitaphanashylar «pedagog» laýazymyna teńestirilgen jaǵdaıda «Pedagog mártebesi týraly» Qazaqstan Respýblıkasy Zańynda qarastyrylǵan barlyq normalar, onyń ishinde attestattaýdan ótý de olarǵa qatysty bolady», - dedi mınıstr.