Mektep kitaphanalaryna 2 mln dana kórkem ádebıet satyp alynady

NUR-SULTAN. QazAqparat – Úkimet otyrysynda Oqý-aǵartý mınıstri Ashat Aımaǵambetov mektep kitaphanalaryna 2 mıllıonǵa jýyq kórkem ádebıet satyp alynatynyn málim etti, dep habarlaıdy QazAqparat tilshisi.

«Búgingi kúni óńirlerde oqýlyqtardy jóneltý jáne jetkizý jumystary 67% oryndaldy. Ekinshi synyp oqýlyqtarynyń 79%-y jetkizildi. Osy aptanyń sońyna deıin tolyǵymen aıaqtaıtyn bolamyz. «Oqýǵa qushtar mektep» jobasy aıasynda mektep kitaphanalaryna 2 mln-ǵa jýyq dana qyzyqty kórkem ádebıet satyp alynady. Jańa oqý jylynda balalardy kitap oqýǵa baýlý jumystaryn ári qaraı jalǵastyramyz», - dedi vedomstvo basshysy.

Mınıstrdiń málimeti boıynsha, bıyl salynýy josparlanǵan 225 mekteptiń 81-i osy oqý jyly bastalǵanǵa deıin qoldanysqa berilmek.

«Jergilikti ákimdikter bıyl 225 mektep salýdy josparlady. Oqý jylynyń basyna deıin 41 memlekettik mektepti jáne 40 jekemenshik mektepti ashý jumystary aıaqtalýy tıis. Ár óńirge naqty kórsetkishter bekitilgen», - dedi Ashat Aımaǵambetov.