Mektep qysqa daıyn ba: SQO-da aýyl turǵyndary bilim ordasynyń qazirgi jaǵdaıyna alańdaýly
PETROPAVL. KAZINFORM – Soltústik Qazaqstan oblysy Taıynsha aýdanyndaǵy Leonıdovka negizgi mektebi, turǵyndardyń aıtýynsha, qysqa daıyn emes.
Ata-analar bul máseleni áleýmettik jelide kóterdi. Sózderine qaraǵanda, aýyldaryndaǵy eki qabatty mektep ǵımaratynyń ekinshi qabaty bıyl jabylmaq. Saldarynan birer jylda mektep te tolyq jumysyn toqtatýy múmkin.
- Aýylda eki úlken sharýashylyq bar. Olar mekteptiń qazandyǵyn jóndeýge kómektesýge daıyn. Qazir bizge mektepke mobıldi qazandyq ákelip ornatamyz dep aıtty. Ol tek birinshi qabatty ǵana jylytýǵa qaýqarly. Sol sebepti joǵary qabatty ajyratyp, jaýyp tastaýdy usynyp otyr, - deıdi ata-analar.
Olardyń aıtýynsha, bilim ordasyna 2-3 jyl buryn ǵana jańa qazandyq ornatylǵan. Sondaı-aq, qysqa qajetti kómir de bar.
- Biz mekteptiń qazandyǵyn jóndep berýdi suraımyz. Mektep jabylsa aýyl joıylady. Óıtkeni balany ınternatqa berýge daıyn emespiz. Kúnde aparyp-ákelýge jol jaman. Qurǵaqta greıdermen júrse, jańbyrda ol ezilip, júrý múmkin bolmaıdy. Joldy da jylda jóndeımiz dep ýáde etip keledi, - deıdi turǵyndar.
Taıynsha aýdandyq bilim bóliminiń málimetinshe, Leonıdovka negizgi mektebi 1988 jyly salynǵan. 495 orynǵa shaqtalǵan mektepte qazir 1-9 synyptarda 50 oqýshy bilim alyp jatyr.
- Mektepke sońǵy ret 2025 jyly kúrdeli jóndeý júrgizilgen. Atap aıtqanda, ǵımarattyń shatyry aýystyryldy, bul jumystarǵa 46 mln 705 myń teńge jumsaldy. Sondaı-aq mekteptiń terezelerin, sport zalyn aǵymdaǵy jóndeýge smeta qurylǵan, ol belgilengen tártippen oblystyq bıýdjettik komıssııanyń qaraýyna usynylmaq. Bıyl mekteptiń jylytý júıesine aǵymdaǵy jóndeý júrgizilip jatyr. Oǵan 12 mln 187 myń teńge bólingen, - delingen bilim bólimi bergen jaýapta.
Mamandardyń aıtýynsha, 2024 jyly mektepke eki jańa qazandyq ornatylyp, búginde olar tolyq qýatynda jumys istep tur. Ár oqý jyly bastalar aldynda jylytý júıesi mindetti túrde qysymmen tekserilip, jýylady.
Aldaǵy jylytý maýsymyna daıyndyq aıasynda mektepke 533 tonna kómir satyp alynǵan.
- Mektep ǵımaratynyń ekinshi qabatyn jabý nemese konservatsııalaý máselesi qazirgi ýaqytta qarastyrylyp otyrǵan joq, - deıdi Taıynsha aýdandyq bilim bóliminiń mamandary.
Buǵan deıin mektepterdiń jańa oqý jylyna daıyndyǵyna baqylaý kúsheıtiletinin jazǵan edik.
