Mektep kezinde Oralhan Bókeıdi jazýshy bolady dep esh oılamap edik – Álibek Qańtarbaı
Oralhan Bókeıdiń 80 jyldyq mereıtoıy aıasyndaǵy respýblıkalyq konferentsııaǵa jazýshylar, Abaı, Túrkistan, Jambyl, Aqtóbe, Pavlodar, Shyǵys Qazaqstan oblystarynyń jáne Astana qalasynyń kitaphana mamandary qatysyp jatyr.
Eń áýeli sóz alǵan belgili jazýshy Álibek Asqar Oralhan Bókeı jaıly estelikterimen bólisip, onyń mol murasynyń mańyzdylyǵy jaıly oı qozǵady.
«Qazirgi ýaqytta elimizde eń kóp oqylatyn jazýshy – Oralhan. Ol jýrnalıstıka men kórkem ádebıetti baılanystyryp jazǵan alǵashqy qalamger. Áýeli buǵan keıbireýler qarsy da boldy. Biraq ózińiz zer salsańyz, álemge áıgili jazýshy Ernest Hemıngýeıdyń qaı shyǵarmasyn alsańyz da ishinde jýrnalıstıkanyń izi baıqalady. Oralhan jazýdy bastaǵanda bári Oralhansha jazǵysy keldi. Biraq oǵan elikteý, soǵan uqsaý múmkin emes. Sebebi Oralhannyń stıli tym erek», - deıdi ol.
Oralhan Bókeıdiń jerlesi, Jazýshylar odaǵy ShQO fılıalynyń dırektory Álibek Qańtarbaıdyń aıtýynsha, mektep kezinde ony jazýshy bolady dep esh oılamaǵan.
«Oralhan jazýshylyqqa jarq etip keldi. Jarq etip keldi de, jarq etip ketti. Osyndaı sharalardyń maqsaty – Oralhan Bókeıdiń baqılyq ǵumyryn máńgilikteý. Kezinde ol únemi «Biz shal bolmaıtyn shyǵarmyz» dep otyratyn. Sóıtsek, sezgen eken ǵoı. Oralhan menen eki synyp joǵary oqydy. Ol kezde aıadaı aýyldan alyp jazýshy shyǵady degenge senbeppiz. Usaq-usaq bulaqtar quralyp, asaý tolqyndy Buqtyrma ózenine aınalady ǵoı. Menińshe, Orekeńniń shyǵarmashylyǵy da osy Buqtyrma sekildi», - deıdi jazýshy.
Mektep bitirgen soń Oralhan Bókeı Almatydaǵy Qurmanǵazy atyndaǵy konservatorııaǵa akter mamandyǵyna oqýǵa túsipti.
Biraq anasy onyń akter bolýyna qarsy bolǵan. Sóıtip, sheshesiniń sózinen asa almaǵan Oralhan aýylǵa qaıtqan.
«Aýylda ol traktorshynyń kómekshisi sekildi qara jumys istedi. Biraq sonda shyǵarmashylyqqa daıyndalyp júripti. Biz ony esh sezbedik. Altaıdyń basyna qarap turyp oqys oılar aıtyp qalatyn. Sonysyn túsinbeı qalatynbyz. Joǵary synyptyń qyzdaryna kúnde keshke hat jazyp, qushaq-qushaq qylyp ákelip, bizge oqyp beretin. Sóıtsek, Oralhan hatty ǵashyq bolǵannan emes, asyp-tógilip jatqan shabytyn, shyǵarmashylyǵyn syrtqa shyǵarý, qaǵazǵa túsirý úshin jazady eken», - deıdi Álibek Qańtarbaı.
