Mektep qaýipsizdigine beıjaı qaraǵan 24 basshy aıyppul arqalady

ASTANA. QazAqparat – Balalardyń qaýipsizdigin qamtýda mektepterdi tıisti qural-jabdyqpen qamtý jumysyna salǵyrt qaraǵan basshylar jaýapqa tartyldy. Bul týraly Іshki ister mınıstriniń birinshi orynbasary Marat Qojaev málim etti, dep habarlaıdy QazAqparat tilshisi.

«Bizdiń mınıstrlik múddeli memlekettik organdarmen birlesip, balalardyń qaýipsizdigin qamtamasyz etý boıynsha sharalar qabyldaýda. 27 tamyz ben 30 qyrkúıek aralyǵynda «Nazar aýdar – balalar!» atty jedel-profılaktıkalyq is-sharasy ótkiziledi. Maqsat – jol qaýipsizdigi erejelerin túsindirý, balalardyń jaraqat alýyn azaıtý jáne jol júrý erejelerin saqtaý saýatyn arttyrý. Alǵashqy 3 kúnde mektepter ornalasqan jerlerdegi jol belgileri men baǵdarshamdardyń jumysy tekseriledi. Sondaı-aq balalardy tasymaldaıtyn avtobýstardyń lıtsenzııasynyń bar-joǵy qaralady», - dedi Marat Qojaev Úkimet otyrysynda.

Sonymen qatar aktsııa aıasynda ishki ister organdarynyń basshylary mektepterde qaýipsizdik negizderi boıynsha dáris ótkizedi.

«Іshki ister organdary 5 620 mekemeniń qaýipsizdik júıelerimen jabdyqtalýyn tekserdi. Nátıjesinde 2 900 obektide zańbuzýshylyq anyqtaldy. Atap aıtqanda, beınebaqylaý júıeleriniń standarttarǵa sáıkes kelmeýi, dabyl túımeleriniń joqtyǵy, týrnıketter men lıtsenzııalanǵan kúzettiń bolmaýy. Barlyǵy 24 basshy jaýapqa tartylyp, olarǵa 5,4 mln teńge aıyppul salyndy. Qalǵandaryna kemshilikterdi joıý týraly uıǵarym berildi», - deıdi ol.

Onyń aıtýynsha, mektepterde qaýipsizdikti qamtýǵa qatysty tekserister jalǵasyp jatyr.