Mektep gınekologteri oqýshy qyzdardy qandaı jaǵdaıda teksere alady
ASTANA. KAZINFORM — Densaýlyq saqtaý mınıstrligi joǵary synypta oqıtyn qyz balalar úshin akýsher-gınekolog mamanynyń konsýltatsııasyn engizý týraly usynystyń mánin resmı túsindirdi.
Kazinform agenttigi joldaǵan saýaldyń Ana men bala densaýlyǵyn qorǵaý departamentiniń resmı jaýabynda, akýsher-gınekologtiń konsýltatsııasy Densaýlyq saqtaý mınıstriniń 2020 jylǵy 15 jeltoqsandaǵy № QR DSM-264/2020 buıryǵyna engiziletin ózgeristerde negizdelmek.
Maqsat — qyz balalarda kezdesetin jynystyq jáne reprodýktıvtik júıe aýrýlarynyń erte belgilerin anyqtaý. Erte belgilerdi aldymen jalpy praktıka dárigerleri nemese pedıatrlar anyqtaıdy, sodan keıin qajet bolǵan jaǵdaıda olar qyzdardy gınekologke jibere alady.
Ol úshin birqatar naqty usynym qarastyrylǵan.
— Qyz balalardy gınekologtiń qaraýy olardyń jynystyq jetilýi men reprodýktıvtik júıesiniń jaǵdaıyna baılanysty shaǵym bolǵan kezde, sondaı-aq profılaktıkalyq maqsatta aýytqýlardy erte anyqtaý, aýrýlardyń aldyn alý, bolashaqtaǵy asqynýlardyń aldyn alý jáne durys gıgıenalyq daǵdyny qalyptastyrý úshin júrgiziledi, — dep túsindirdi Ana men bala densaýlyǵyn qorǵaý departamentiniń dırektory Maǵrıpa Embergenova.
Gınekologtiń qyz balany tekserý protsesi alǵashqy medıtsınalyq-sanıtarııalyq kómek uıymynda jáne jastar densaýlyǵy ortalyǵynda júrgiziledi. Alaıda tekserýdiń aldynda qyz balanyń ata-anasynyń nemese zańdy ókiliniń kelisimi qajet.
Sonymen qatar, vedomstvo atap ótkendeı, 16 jastan asqan qyzdar «Halyq densaýlyǵy jáne densaýlyq saqtaý júıesi týraly» kodekstiń 78-babynyń 2-tarmaǵyna sáıkes profılaktıkalyq kómekke óz betinshe kelisim berýge nemese odan bas tartýǵa quqyly.
Aıta ketsek, elimizde jasóspirimder arasyndaǵy júktilik máselesi jıi qozǵalady.