Mektep formasyn qalaı tańdaý kerek

ASTANA. QazAqparat – Mektepke arnalǵan kıimge qoıylatyn barlyq talap «Balalar men jasóspirimderge arnalǵan ónimniń qaýipsizdigi týraly» Keden odaǵynyń tehnıkalyq reglamentine cáıkes retteledi. Osyǵan oraı DSM Sanıtarııalyq-epıdemııalogııalyq baqylaý komıteti oqýshylardyń mektep formasyn alarda osy talaptarǵa saı bolýyn qadaǵalaýǵa shaqyrdy, dep habarlaıdy QazAqparat.

Tehnıkalyq reglamentke sáıkes ol hımııalyq, bıologııalyq qaýipsizdikti (bos formaldegıdtiń massalyq úlesi, gıgroskopııalyǵy, aýa ótkizgishtigi) qamtamasyz etetindeı etip daıyndalýy tıis. Kıimge arnalǵan materıaldar boıaýynyń ornyqtylyǵyna qoıylatyn talaptarǵa sáıkes kelýi tıis. Esińizde bolsyn, bala mektep formasynda bes-alty saǵat nemese odan da kóp ýaqyt ótkizedi, sondyqtan sıntetıkalyq materıaldy tańdamańyz. Bul balanyń júıke júıesine áser etetin statıkalyq elektr energııasynyń jınalýyna yqpal etedi, ıaǵnı ol titirkenýdi týdyryp, tez sharshaýǵa ákelýi múmkin. Quramynda tabıǵı talshyqtar basym matalardan jasalǵan ónimdi alǵan durys. Maqta men zyǵyr matalaryn jaz ben kóktemgi ýaqytqa, jún men kashemırdi kúz ben qys ýaqytyna tańdaǵan abzal.

Sonymen birge balalar kıimin satyp alǵanda, tańbalaýdy oqyp shyǵyńyz, ol senimdi, anyq, ońaı oqylatyn, memlekettik jáne orys tilderinde bolýy kerek.

Tańbalaý kelesi aqparatty qamtýy kerek:

- ónim daıyndalǵan eldiń ataýy;

- daıyndaýshynyń (daıyndaýshy ýákilettik bergen tulǵanyń), ımporttaýshynyń, dıstrıbıýtordyń ataýy jáne ornalasqan jeri;

- buıymnyń ataýy;

- daıyndalǵan kúni (aıy, jyly);

- «EAS» belgisi;

- materıaldaǵy tabıǵı jáne hımııalyq shıkizattyń túri men salmaqtyq úlesi (paıyzdyq quramy);

- júnniń túri jáne ony óńdeý túri (boıalǵan nemese boıalmaǵan);

- buıymnyń ólshemi.

Sonymen qatar qajet bolǵan jaǵdaıda:

- buıymdy kútý sımvoldary jáne (nemese) paıdalaný protsesinde buıymdy kútý erekshelikteri jónindegi nusqaýlyq;

- buıymnyń túri (maqsaty);

- ónimniń qyzmet etý merzimi;

- kepildi qyzmet etý merzimi;

- bar bolǵan jaǵdaıda taýar belgisi.

Sonymen qatar balalar kıimine onyń tehnıkalyq reglamentter talaptaryna sáıkestigin rastaıtyn qujattar (sáıkestik sertıfıkaty, sáıkestik týraly deklaratsııa) bolýy tıis. Sondyqtan satýshydan osy qujattardy talap etýge quqyǵyńyz bar. Bolmaǵan jaǵdaıda, taýardy satyp alýdan aýlaq bolyńyz. Sondaı-aq mektep formasyn mamandandyrylǵan dúkenderden satyp alý usynylady.