Mektep formasyn bir ǵana taýar óndirýshiden satyp alý mindetti emes - ákimdik
ASTANA. QazAqparat - Biryńǵaı mektep formasyn bazardan da satyp alýǵa bolady, biraq kıim klassıkalyq stılge sáıkes, qara kók tústi bolýy kerek, dep habarlandy elordalyq ákimdikdiń medıa ortalyǵynan.
Astana oqýshylarynyń qara kók tústi biryńǵaı formaǵa kósheýi kezeń-kezeńmen júzege asyrylady. Bıylǵy oqý jylynda tek birinshi synyp oqýshylaryna ǵana sabaqqa pıdjak pen shalbar kııýge ruqsat etiledi, - dep habarlady medıa ortalyq tilshisine qalalyq bilim basqarmasynyń jetekshisi Anýar Janǵozın.
«Birinshi synyp oqýshylary úshin qara kók tústi forma satyp alynýda. Qalǵan synyp oqýshylaryna bundaı forma qolda bar mektep formasy kııýge jaramaı qalǵan kezde satyp alynatyn bolady. Osylaısha bir tústes mektep formasyn engizý kezeń kezeńmen iske asyrylady», - dedi A. Janǵozın.
Uldar úshin mektep formasy qara kók tústi pıdjak, kókirekshe, shalbar, toqylǵan kókirekshe jáne aq tústi jeıdeden quralady. Degenmen bıyl ata-analardyń shaǵymy men suraýlary eskerildi, endigide kıimniń barlyq jıyntyǵyn satyp alý mindetti emes. Eń negizgi bolyp aq jeıde, kókirekshe men shalbar belgilendi. Qyzdar úshin eń negizgisi bolyp - sarafan jáne jeıde, kókirekshe jáne beldemshe nemese kókirekshe, jeıde jáne shalbar belgilendi. Bilim basqarmasy atap ótkendeı, mektep basshylyǵy mektep formasyn bir ǵana taýaróndirýshiden alýǵa májbúrleýge quqyǵy joq.
«Ata-analar qazirgi kezde dúkenderde mektep formasynyń kóptegen túri bar ekendigin alǵa tartýda. Múmkin bireýiniń mektep formasyn dúkennen satyp alýǵa shamasy joq shyǵar, olar endigide mektep kıimin bazardan da satyp ala alady. Sáıkesinshe, qazir mektep formasyn satyp alýda eshkimge shekteý qoıylmaıdy. Formany kez kelgen jerden satyp alýyńyzǵa bolady, tek túsi men stıline mán berseńiz boldy», - dedi Janǵozın.
«Mektep formasyn tek bir taýaróndirýshiden satyp alýǵa májbúrlegen jaǵdaıǵa tap bolsańyz, Bilim basqarmasyna habarlasýyńyzdy suraımyz»,- dep atap ótti ol.
