Mektep formasyna saı emes kıim kıgen oqýshyny sabaqtan shettetýge bolmaıdy – mınıstrlik
ASTANA. KAZINFORM – Mektep formasyna qoıylatyn talaptardy saqtamaǵan oqýshyny mektepke kirgizbeýge nemese sabaqtan shettetýge bolmaıdy. Bul týraly QR Oqý-aǵartý mınıstrliginiń birinshi vıtse-mınıstri Shynar Aqparova málimdedi.
Onyń aıtýynsha, qoldanystaǵy zańnamaǵa sáıkes, balany oqý protsesinen shettetýge jol berilmeıdi.
– Bala sapaly bilim alýǵa quqyly. Sondyqtan oqýshyny mektepke kirgizbeýge bolmaıdy, – dedi Shynar Aqparova.
Sonymen qatar birinshi vıtse-mınıstr ata-analar men bilim alýshylardyń mektep formasyna qatysty belgilengen talaptardy saqtaýy tıis ekenin atap ótti.
– Alaıda Qazaqstan Respýblıkasynyń zańnamasy bar ekenin jáne onyń talaptary oryndalýy tıis ekenin atap ótkim keledi. Bul talaptar Qazaqstan Respýblıkasynyń Konstıtýtsııasynda da bekitilgen. Bilim alýshylarǵa qatysty talaptar «Bilim týraly» zańnyń 47-babynda, al ata-analardyń mindetteri 49-bapta kórsetilgen. Ata-analar bilim berý uıymy belgilegen mektep formasyn saqtaýyn qamtamasyz etýge mindetti, – dedi spıker.
Mektep formasyna qoıylatyn talaptardy bilim berý uıymy ata-analar qaýymdastyǵymen jáne qamqorshylyq keńespen birlesip aıqyndaıdy.
– Mektep formasy bilim berý uıymy tarapynan bekitiledi. Onyń talaptaryn saqtamaǵan jaǵdaıda zańnamada tıisti jaýapkershilik qarastyrylǵan, – dep tolyqtyrdy birinshi vıtse-mınıstr.
Aıta keteıik, mekteptegi aralyq baǵalaý ne úshin kerek ekenin jazǵanbyz.
