Mektep, emhana, úı janyndaǵy dúken – Áleýmettik ámııan servısi qashan iske qosylady

ASTANA. QazAqparat - Premer-Mınıstrdiń orynbasary – QR saýda jáne ıntegratsııa mınıstri Serik Jumanǵarın elordada Áleýmettik ámııannyń pılottyq tsıfrlyq servısterin engizý barysyn tekserdi. QazAqparat bul týraly primeminister.kz saıtyna silteme jasap.

Astanadaǵy №8 mektep-lıtseıi men №10 emhana áleýmettik ámııan arqyly azamattardy aqshalaı jáne aqshalaı emes memlekettik qoldaýdyń tsıfrlyq quraldaryn qurý boıynsha pılottyq jobaǵa qatysyp jatyr. «Jalpy bilim beretin mektepterdi tegin, jeńildetilgen ystyq tamaqpen qamtamasyz etý», «Mindetti áleýmettik medıtsınalyq saqtandyrý sheńberinde dári-dármekpen jáne dárigerdiń usynysy (retsepti) boıynsha tegin medıtsınalyq kómektiń kepildik berilgen kólemimen qamtamasyz etý» qyzmetteri synaqtan ótýde.

№8 mektepte 1675 bala oqıdy, onyń ishinde 5-11 synypta oqıtyn 63 oqýshy az qamtylǵan otbasynan shyqqan. Mektep ashanasyn aralaý barysynda Serik Jumanǵarınge «Áleýmettik ámııan» qosymshasynyń demo-nusqasy kórsetildi.

Joba ónerkásiptik paıdalanýǵa berilgennen keıin ystyq tamaqqa joldama alý úshin memleketten áleýmettik qoldaý alatyn balalardyń ata-analaryna ótinish jazýdyń qajeti bolmaıdy. Olardyń uıaly telefon nómirine SMS habarlama jiberiledi, sodan keıin balanyń kólik kartasyn Áleýmettik ámııanǵa qosyp, ony mektepte jeńildikti túski as alý úshin paıdalanýǵa bolady.

Serik Jumanǵarın jaqyn mańdaǵy «Áleýmettik tólemder esebinen taýarlardy satyp alý» qyzmeti synaqtan ótken úı janyndaǵy dúkende boldy. Bul ataýly áleýmettik kómek alýshylarǵa, sonyń ishinde negizgi azyq-túlik ónimderin satyp alýǵa bólinetin, olardy dúkenderden QR tólemin qoldana otyryp satyp alýǵa múmkindik beredi.

Mindetti áleýmettik medıtsınalyq saqtandyrý jáne retsept boıynsha tegin medıtsınalyq kómektiń kepildik berilgen kólemi boıynsha dári-dármekpen qamtamasyz etý sheńberinde dárilik zattardy alý úshin 83 myń azamat tirkelgen №10 qalalyq emhananyń bazasynda Áleýmettik ámııan Densaýlyq saqtaý mınıstrliginiń aqparattyq júıelerimen biriktiriletin bolady.

Bul qyzmet dárigerdiń tsıfrlyq retseptisi qoldanýshy-patsıenttiń telefonyna birden túsetindigimen yńǵaıly. Medıtsına qyzmetkerlerine qujattardy qolmen toltyrý, al patsıentke qaǵaz retseptini alyp júrýdiń qajetiligi bolmaıdy.

«Áleýmettik qoldaýdyń aqshalaı emes túrleriniń tetigi qazirdiń ózinde jetkilikti túrde ázirlengen dep sanaımyn, aqshalaı túrleri boıynsha biz olardy tek bank kartalaryna ǵana emes, Áleýmettik ámııanǵa da alýǵa bolatyndaı etip qarastyramyz jáne ártúrli nusqalardy usynamyz. Sonymen qatar azamat memlekettik qoldaý sheńberinde, mysaly, ataýly áleýmettik kómek – áleýmettik mańyzy bar azyq-túlik ónimderin satyp alýǵa esepteletin qarajatty kóre alady», — dep túıindedi Serik Jumanǵarın.

Foto: primeminister.kz