Mektep emes, qora sııaqty: Shymkenttegi № 40 mekteptegi ahýal jelide shý týǵyzdy
ShYMKENT. KAZINFORM — Alpamys batyr atyndaǵy № 40 mekteptegi ahýal ata-analardyń narazylyǵyn týdyrdy. Áleýmettik jelide oqý ornynan túsirilgen beınejazba tarady. Onda mektep qasbetiniń alba-julbasy shyǵyp turǵanyn kórýge bolady.
Vıdeony mektep bitirýshi túlekterdiń biriniń anasy jarııalaǵan. Onda ǵımarattyń syrtqy qaptamasy búlingeni kórsetilgen. Avtor oqý jyly aldynda mekteptiń mynandaı jaǵdaıda turǵanyna alańdaýshylyq bildirdi.
— 40-shy mekteptiń jaǵdaıyn qarańdar. Osy betinshe balalardy birinshi qyrkúıekte oqýǵa qabyldamaq. Mekteptiń qasbeti ózi qulap qaldy degendi qalaı túsinýge bolady? Qulasa, memleketten qarjy surap, jóndeý jumysyn júrgizý kerek qoı. Mektep emes, qora sııaqty, — deıdi Shymkent turǵyny óz beınejazbasynda.
Vıdeo jarııalanǵannan keıin jeli qoldanýshylary «bul — mekteptiń eski korpýsy» ekenin jazdy. Aıtýlarynsha, onyń artynda jańa ǵımarat ornalasqan. Bul pikirlerden keıin beınerolık avtory mektepke qaıta bardy. Ol joly aýmaqty túgel aralap, basqa jaǵyn da túsirdi.
— Maǵan pikir bildirýshiler bul eski ǵımarat, al onyń artynda jańasy bar dep jazdy. Mine, men kórsetip turmyn: ǵımarat artynda tek aǵashtar men alań ǵana bar, basqa eshteńe joq. Bul másele boıynsha men mektep ákimshiligine júgindim. Kúrdeli jóndeý jumystary 2027 jyly jasalady degen jaýap aldym. Mekteptiń jóndelmegenine 12 jyl bolǵan. Meniń balam 11-shi synypta oqıdy. Men joldyń arǵy betinde turamyn. Biraq mekteptiń jaǵdaıyn kórgende zárem ushty, — dep baıandady beınejazba avtory.
Shymkent qalasynyń bilim basqarmasy mektepte kúrdeli jóndeý jumysy 2014 jyly júrgizilgenin rastady. Ol kezde mektep terezeleri men esikteri, shatyry, qasbeti men qabyrǵalary jańartylǵan.
— Mekteptiń qazirgi tehnıkalyq jaǵdaıyn anyqtaý maqsatynda tehnıkalyq saraptama júrgizildi. Saraptama nátıjesine sáıkes, qazirgi tańda jobalyq-smetalyq qujattardy ázirleý jumystary júrgizilip jatyr, — deıdi bilim basqarmasy.
Kúrdeli jóndeý jumysy 2027 jylǵa josparlanǵan.
Vedomstvo josparlanǵan jóndeý jumysy barysynda ǵımarattyń tehnıkalyq jaǵdaıyna sáıkes tolyq keshendi jumys júrgizý kózdeletinin naqtylady. Onyń ishinde qasbetti qalpyna keltirý de qamtylady.
Buryn Atyraý oblysyndaǵy aýyldyq mekteptiń jaǵdaıy týraly habarlanǵan. Ata-analardyń aıtýynsha ǵımarattyń shatyrynan sý aǵady. Qabyrǵalarda jaryqtar bar. Soǵan qaramastan kúrdeli jóndeý jumystary áli bastalmady.
Aýdarǵan: Aıym Erkinbekqyzy
