Mektep dırektoryn ata-analar saılaıdy
ASTANA. QazAqparat - Bıyldan bastap mektep dırektorlaryn taǵaıyndaý erejeleri ózgerdi, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, aldaǵy ýaqytta mektep dırektorlarynyń kásibı deńgeıin kóterý máselesine basa nazar aýdarylady. Osyǵan baılanysty dırektorlardy taǵaıyndaý qaǵıdalary ózgerdi.
«Jańa qaǵıdalarǵa sáıkes úmitker 4 etaptan turatyn konkýrstan ótedi. Aldymen mekteptiń qamqorshylyq keńesinen ótý kerek. Odan keıin zańnama testi, oblystyq bilim basqarmasynyń kelisýi, aýdandyq, qalalyq bilim bólimderindegi suhbat bar. Mektep dırektory tek 4 jylǵa taǵaıyndalady. Ári qaraı jumys isteımin dese, konkýrstan qaıta ótý múmkindigi bar», - dedi E.Saǵadıev Tamyz konferentsııasynyń plenarlyq májilisinde.
Aıta keteıik, mekteptiń qamqorshylyq keńesine ákimdik ókilderi, mektep basshylyǵy, demeýshiler, mektep túlekteri, ata-analar men úkimettik emes uıymdardyń ókilderi kiredi.
Mınıstrdiń aıtýynsha, aldaǵy ýaqytta qamqorshylyq keńesterdiń belsendiligin kóterý kózdelgen. Sonda qoǵam, ata-analar tarapynan qoıylatyn talaptar jergilikti deńgeıde sheshiletin bolady.
Bıyl mınıstrlik muǵalimderdiń júktemesine qatysty buıryqty da shyǵardy. Oǵan sáıkes, mektep muǵalimi tek 5 qujatty ǵana toltyrýǵa mindetti. Budan bólek, mektep pen ata-analar arasynda kelisimsharttar rásimdeledi. Atalǵan bastama alǵash ret bıylǵy oqý jylynan bastap engizilip otyr.
