Mektep dırektory psıhologty jumysqa qabyldaý úshin para alǵan

NUR-SULTAN. QazAqparat – Batys Qazaqstan oblysy Terekti aýdanynda orta mektep dırektory para alý kúdigine ilindi, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.

«Batys Qazaqstan oblysynyń sybaılas jemqorlyqqa qarsy qyzmeti BQO Terekti aýdany bilim bólimi Podstepnyı orta mektebiniń dırektoryna qatysty sotqa deıingi tergeýdi bastady. Ol mektepke áleýmettik pedagog-psıholog retinde jumysqa alý úshin 300 myń teńge para alǵan», - delingen agenttiktiń resmı habarlamasynda.

Kinásin moıyndaýyna baılanysty kúdikti men onyń advokaty sotqa deıingi jedel tergeý júrgizý týraly ótinimhat jibergen.

«Kúdiktige qatysty túpkilikti sheshimdi onyń kinásiniń deńgeıin anyqtaý arqyly sot qabyldaıdy», - dep habarlady agenttik.