Mektep dırektorlarynyń jalaqysyn kóterý máselesi sheshiledi – mınıstr

NUR-SULTAN. QazAqparat – Mektep pen kolledjderde dırektorlardyń tapshylyǵy baıqalyp otyr. Bul týraly pedagogterdiń respýblıkalyq tamyz konferentsııasynda Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Mektep pen kolledjge, balabaqshalarǵa kerek bilikti dırektorlardyń tapshylyǵy baıqalyp otyr. Qazirgi kezde biraz bos oryn toltyrylmaı tur. Árıne, muǵalimniń eńbegi men biliktiligi óte mańyzdy. Biraq barlyq máseleni sheshkenimen, bilikti ári bilimdi dırektor bolmasa, onda basqa jasalyp jatqan jumystar tıisti nátıjesin bermeıtini anyq. Dırektorlardyń jalaqysy muǵalimdermen salystyrǵanda az ekeni belgili», - dedi A. Aımaǵambetov.

Osy oraıda mınıstr dırektorlarǵa úlken jaýapkershilik júkteletinin eske saldy.

«Olarǵa túrli aıyppuldar salyp ketedi. Ata-analarmen jáne muǵalimdermen jumys isteý kerek. Alaıda dırektorlardyń alatyn jalaqysy óte tómen. Sondyqtan osy baǵytta jańa oqý jylynda bul máseleni sheshý turǵysynda tıisti jumystardy atqaramyz», - dedi vedomstvo basshysy.

Rotatsııa tetigi ary qaraı jalǵasatynyna toqtalǵan A. Aımaǵambetov: «Qazir 400-den astam dırektor jańa oqý oryndaryna baryp, jumysyn jalǵastyryp jatyr. Osy áriptesterimizge úlken alǵysymdy aıtqym keledi», - dedi.

Budan buryn habarlanǵandaı, Qazaqstanda oqý úlgerimi tómen oqýshylar úshin arnaıy joba iske qosylady.