Mektep dırektorlarynyń jalaqysy artady – mınıstr
Bul týraly «Bilim jáne ǵylym – eldiń turaqty damýynyń kepili» taqyrybyndaǵy pedagogterdiń Respýblıkalyq tamyz konferentsııasynyń plenarlyq sessııasynda QR Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.
«Qazirgi kezde mektep basshylyǵynyń jalaqy máselesi ózekti bolyp tur. Jalaqynyń qazirgi deńgeıine qarap, básekege qabiletti menedjerler basshylyq qyzmetke barýǵa qyzyqpaıdy. Jalpy, úzdik pedagogtar mektep dırektory nemese oqý isiniń meńgerýshisi laýazymyna barmaı jatady», - dedi Ashat Aımaǵambetov.
Osy oraıda mınıstr bul baǵytta tıisti ózgerister kerek ekenin atap ótti.
«Mektep dırektorlarynyń jalaqysy ustazdyń eńbekaqysynan tómen bolatyn jaǵdaılar jıi kezdesedi. Bul turǵyda táýekelder deńgeıi ártúrli ekeni belgili. Bilim mınıstrligi mektep dırektorlaryna jalaqy tóleý júıesine ózgeris engizýdi josparlap otyr», - dedi ol.
Budan buryn habarlanǵandaı, bıyl pedagogtardyń quqyqtaryn buzý týraly júzden astam ótinish qaraldy.
2022 jyldyń qańtarynda balabaqsha men mektep, kolledj pedagogtarynyń jalaqysy 25 paıyzǵa ósedi.
