Mektep dırektorlarynyń aılyǵy muǵalimderdikinen tómen – mınıstr

TALDYQORǴAN. QazAqparat - Oqý-aǵartý mınıstri Ǵanı Beısembaev mektep dırektorlarynyń aılyǵy kóteriletinin jetkizdi, dep habarlaıdy QazAqparat tilshisi.

«Mektep ákimshiliginiń aılyǵy muǵalimdikinen de tómen. Sondyqtan mınıstrlik mektep ákimshiliginiń ıaǵnı, dırektor men onyń orynbasarlarynyń aılyǵyn kóterý boıynsha jumys júrgizip jatyr. Budan bylaı mektep ákimshiliginiń aılyǵy muǵalimderdikinen kóp bolmasa, az bolmaıtyn bolady. Óıtkeni mektep basshylarynyń jaýapkershiligi úlken. Olarǵa júktelip jatqan mindet kóp. Sondyqtan mektep basshylyǵy tıisti aılyǵyn alýy kerek», - dedi Oqý-aǵartý mınıstri Ǵanı Beısembaev Taldyqorǵanda aǵartý salasynyń mamandarymen ótken jıynda.

Buǵan deıin mınıstr muǵalimderdi zańbuzýshylyqpen qabyldaý faktileri eń kóp tirkelgen aımaqtardy ataǵan bolatyn.

Mundaı jaǵdaı boıynsha Almaty oblysynyń Qarasaı aýdany kósh bastap tur.

Sondaı-aq Oqý-aǵartý mınıstri Ǵanı Beısembaev «Altyn belgi» alý úshin ata-analar túrli qýlyq-sumdyqqa baratynyn sóz etti.

Mınıstr oqýshylar arasyndaǵy tóbeleske pikir bildirip, birinshi kezekte ata-ana balasynyń tárbıesine jaýapkershilikpen qaraýy kerektigin qadap aıtty.