Mektep dırektorlarynyń jetispeýshiligi úsh ese qysqardy
ASTANA. KAZINFORM — Oqý-aǵartý mınıstriniń tóraǵalyǵymen oblys ákimderiniń orynbasarlarymen ótken keńeste mektep dırektorlaryn bos laýazymdarǵa taǵaıyndaý máselesi qaraldy.
2023 jyldan bastap Memleket basshysynyń tapsyrmasy boıynsha QR Oqý-aǵartý mınıstrligi mektepterde basqarýshylardyń jańa býynyn qalyptastyrýǵa baǵyttalǵan «Bilim berýdegi ózgeristerdiń 1000 kóshbasshysy» strategııalyq jobasyn iske asyryp keledi. Eki jyl ishinde irikteýdiń barlyq kezeńderinen sátti ótken 583 kandıdat respýblıkalyq kadr rezerviniń quramyna endi. 2025 jyly taǵy 400 úmitker oqýdan ótip jatyr.
Jobany iske asyrý barysynda mektep dırektorlarynyń tapshylyǵy úsh esege qysqardy. Óńirlerdiń basym bóligi basqarýshy laýazymdaryna arnaıy daıyndyqtan ótken mamandardy taǵaıyndaý arqyly kadrlyq rezervtiń múmkindikterin tıimdi paıdalanady.
Odan bólek, 4 myńǵa jýyq dırektor «Órleý» BAUO-da qysqa merzimdi kýrstardan ótti, bul mektepterdegi basqarý áleýetin nyǵaıtýǵa jáne bilim berý júıesindegi menedjment sapasyn arttyrýǵa múmkindik beredi.
— Joba aıtarlyqtaı nátıje berdi, mektepterde jańashyl, yntaly menedjerler paıda bolady. Endi bul protsess júıelep, qalǵan barlyq bos jumys oryndarǵa basqarýshy kadrlardy taǵaıyndaýdy tamyz aıynda aıaqtaý mańyzdy. Bul — dırektorlardy taǵaıyndaý ǵana emes, sonymen qatar bilim berýdegi basqarý mádenıetin júıeli túrde jańartý. Atalǵan baǵyttaǵy jumystar naqty ózgerister men bilim berý sapasyn arttyrýǵa múmkindik beredi, — dedi Ǵanı Beısembaev.
Mınıstrdiń aıtýynsha, birqatar óńirlerde kadr rezerviniń áleýeti tolyq paıdalanylmaı otyr. Máselen, Almaty, Qaraǵandy, Abaı, Pavlodar jáne Túrkistan oblystarynda basqarýshy kadrlarǵa qajettilik basym.
Mınıstr tamyz aıynda qalǵan bos jumys oryndaryna taǵaıyndaýdy aıaqtaý týraly tapsyrmanyń oryndalýyna oblystyq bilim basqarmalarynyń basshylary derbes jaýapty bolatynyn atap ótti.
Aıta keteıik, mektepterdegi jańa oqý jylynyń kestesi bekitildi.