Mektep dırektorlarynyń qyzmet merzimi 10 jylǵa uzartylady

ASTANA. KAZINFORM — Mektep dırektorlarynyń rotatsııalaý erejesi ózgeredi. Bul týraly Oqý-aǵartý mınıstrligi Orta bilim berý komıtetiniń tóraǵasy Jumashev Qanybek Ortalyq kommýnıkatsııalar qyzmetinde ótken baspasóz máslıhatynda málim etti. 

— Bizde rotatsııa týraly arnaıy buıryq bar. Sol buıryq boıynsha, rotatsııa bir eldi mekenniń kóleminde ǵana júzege asyrylady. 7 jyl basshylyq qyzmette bolǵan adam mindetti túrde rotatsııaǵa jatady. Biraq bir eldi mekende bir nemese eki mektep qana bolýy múmkin. Ondaı jaǵdaıda basshylar bir-biriniń ornyna otyryp qana rotatsııa jasaı alady. Sebebi basqa eldi mekenge rotatsııalanatyn bolsa, onyń baryp-kelý shyǵyndaryn, turǵyn úı shyǵyndaryn bıýdjet kóterý kerek. Jergilikti bıýdjette ondaı shyǵyn qaralmaǵandyqtan rotatsııa múmkin bolmaı jatady. Sonyń saldarynan 10 jyldan astam ýaqyt boıy basshy bolyp otyrǵan adamdardyń keısin kórip otyrmyz, — deıdi ol.

Aıtýnysha, mınıstrlik rotatsııa erejesine ózgeris ázirlep jatyr.

— Mektep basshylary eki ret 5-5 jyldan, ıaǵnı, tolyqqandy 10 jyl bir mektepte dırektor bola alady. Odan keıin rotatsııa jasaı almaıdy. Qyzmetin aýystyrý kerek bolady. Osyndaı ózgeris engiziledi, — dedi Jumashev Qanybek.

Buǵan deıin Qyzylorda oblysynda sport mektepteriniń dırektorlary 20 jyl boıy qyzmet aýystyrmaǵanyn jazǵan edik.