Mektep dırektory men esepshi muǵalimderdiń jalaqysynan 71 mln teńge jymqyryp qalǵan

ShYMKENT. KAZINFORM — Shymkenttegi bir mekteptiń dırektory men bas esepshisi 8 jylǵa bas bostandyqtarynan aıyryldy. Bul týraly Shymkent qalalyq sottyń baspasóz qyzmeti málimdedi. 

Sottyń anyqtaýynsha, Shymkenttegi mektep dırektory 2022 jyldyń aqpan aıynan 2024 jyldyń tamyzyna deıin bas esepshisimen aldyn ala kelisip, muǵalimderge eńbekaqy esepteý barysynda artyq soma aýdaryp otyrǵan.

— Bul qarajatty esepshi óz shotyna jáne jaqyn týystarynyń shottaryna aýdaryp, keıin qolma-qol aqshaǵa aınaldyryp, ıemdenip otyrǵan. Memleketke keltirilgen jalpy zalal 71 mıllıon teńgeden asty, — delingen sottyń habarlamasynda.

Buǵan qosa, 2022 jyly mektep dırektory óziniń oqý isi jónindegi orynbasary arqyly bir muǵalimdi dekrettik demalystan merziminen buryn shyǵarý úshin 150 myń teńge kóleminde para alǵan.

Nátıjesinde, sot úkimi boıynsha dırektor men esepshi kináli dep tanylyp, árqaısysy 8 jylǵa bas bostandyǵynan aıyryldy. Sondaı-aq olarǵa ómir boıyna memlekettik qyzmette jáne memlekettik mekemelerde laýazym atqarýǵa tyıym salyndy.

Úkim zańdy kúshine engen joq. 

Aıta ketelik Shymkentte alıment tólemegen boryshker sottalǵan edi.