Mektep bitirý keshinde balalardyń qaýipsizdigine erekshe nazar aýdarý qajet – Úkimet basshysy
ASTANA. KAZINFORM – Úkimet basshysy Oljas Bektenov balalardyń qaýipsizdigi men jazǵy demalysty uıymdastyrý máselesin kóterdi.
- Bıyl 200 myńnan astam bala mektep bitiredi. Mindet aıqyn. Barlyq emtıhandy, ulttyq biryńǵaı testileýdi, balalardyń jazǵy demalysy men saýyqtyrý sharalaryn joǵary deńgeıde uıymdastyrý kerek. Testileý men emtıhan kezinde, «sońǵy qońyraý» jáne mektep bitirý keshterinde balalardyń qaýipsizdigin qamtamasyz etýge erekshe nazar aýdarý qajet. Óıtkeni, dál osy kezeńde túrli keleńsiz jaǵdaılardyń qaýpi arta túsedi. Ata-analarǵa aıtarym, mektep bitirý keshterinde, eń bastysy jazǵy demalys kezinde balalardy qaraýsyz qaldyrmaǵan jón. Osyǵan basa kóńil bólýdi suraımyn, - dedi Oljas Bektenov Úkimet otyrysynda.
Odan ári Premer-mınıstr bala ómiri men tárbıesindegi ata-ananyń róline toqtaldy.
- Ata-ananyń aıaly alaqany men meıirimi balanyń janyn jaqsylyqqa bóleıdi. Olardyń boıyndaǵy adamgershilik negizderi, qoǵamdyq ortadaǵy is-áreketi men otanshyldyq qasıetteriniń barlyǵy, birinshi kezekte otbasynda qalyptasady. Eshqandaı mınıstrlik ata-ana qamqorlyǵy men tárbıesin almastyra almaıdy. Elimizdiń laıyqty azamattaryn tárbıeleý – memleket pen qoǵamnyń birlesken úlken eńbeginiń jemisi. Sondyqtan sanaly, bilimdi jáne naǵyz otanshyl azamattardy qalyptastyrýda kúsh-jigerimizdi nyǵaıta túseıik degim keledi, - deıdi O. Bektenov.
Aıta keteıik, «Qazaqstan halqyna» qorynyń qoldaýymen 10 myń bala tegin demalady.