Mektep bitirý keshin meıramhana men tabıǵatta ótkizýge tyıym salyndy
ASTANA. KAZINFORM — Elimizdiń barlyq mektebinde 2025–2026 oqý jyly aıaqtalýǵa jaqyn. Bıyl oqý jylyn 3,9 mıllıonnan astam oqýshy aıaqtaıdy. Onyń ishinde eki júz on bes myńnan astamy – 11-synyp túlekteri.
Oqý jylynyń qorytyndysy boıynsha 9-synypty úzdik aıaqtaýǵa úmitkerler sany 31 myńnan astam oqýshy. Al 11-synypty úzdik aıaqtaýǵa 18 myń oqýshy úmitker. Búginde elimizdiń bilim berý uıymdarynda 420 myńnan astam pedagog eńbek etip jatyr.
Memleket basshysynyń tapsyrmasymen júzege asyrylyp jatqan «Keleshek mektepteri» ulttyq jobasy aıasynda 217 zamanaýı mektep paıdalanýǵa berildi. Onyń 84-i aýyldyq eldi mekenderde ornalasqan. Qazirgi tańda bul mektepterde 220 myńnan astam oqýshy bilim alyp, 16 myńǵa jýyq pedagog jumys istep jatyr.
Oqý jylynyń aıaqtalýyna oraı 25 mamyr kúni elimizdiń barlyq mektepterinde «Bilimim — Otanyma!» taqyrybynda biryńǵaı synyp saǵaty ótkiziledi. Synyp saǵattarynda oqý jyly qorytyndylanyp, oqýshylardyń jetistikteri men jarqyn sátteri eske alynady. Sondaı-aq «Adal azamat» birtutas tárbıe baǵdarlamasynyń negizgi qundylyqtaryna, bilim men ǵylymǵa qurmetti arttyrýǵa, ınnovatsııalyq oılaýdy damytýǵa Halyqtyq Konstıtýtsııada aıqyndalǵan basty strategııalyq baǵyt retinde erekshe nazar aýdarylady. Oqýshylarǵa jazǵy kanıkýl kezinde oqýǵa usynylatyn ádebıetter men kórýge usynylatyn fılmder tizimi tanystyrylady.
— Oqý-aǵartý mınıstrligi men jergilikti atqarýshy organdardyń birlesken buıryǵy men qaýlysyna sáıkes mektepke deıingi, orta, tehnıkalyq jáne kásiptik, orta bilimnen keıingi bilim berý uıymdarynda saltanatty is-sharalardy meıramhanalarda, kafelerde, banket zaldarynda, demalys bazalarynda jáne tabıǵat aıasynda ótkizýge tyıym salynady.
Ata-analardan, zańdy ókilderden jáne bilim alýshylardan saltanatty is-sharalarǵa baılanysty aqsha jınaýǵa, syılyqtar men ózge de materıaldyq qundylyqtar talap etýge jol berilmeıdi. Al attestattar men dıplomdardy saltanatty tabystaý rásimderi tek bilim berý uıymdarynyń qabyrǵasynda uıymdastyrylady, — delingen mınıstrlik habarlamasynda.
Birlesken buıryq bilim alýshylar arasynda mektep bitirý is-sharalaryn ótkizý kezindegi qaýipsizdik pen qoǵamdyq quqyqtyq tártipti qamtamasyz etý, sondaı-aq bilim berý uıymdarynda «Zań men tártip» ıdeologııasyn nyǵaıtýdy kózdeıdi.
Aıta ketelik 1-synypqa qabyldaý: ár óńir boıynsha keste jarııalanǵan edi.
