Mektep bitirýshilerdiń árbir ekinshisin kásiptik oqýǵa baǵyttaǵanda memlekettiń 25 mlrd teńgesi únemdeler edi - senator M. Baqtııaruly
ASTANA. QazAqparat - Bıylǵy mektep bitirýshilerdiń árbir ekinshisin kásiptik oqýǵa baǵyttaı alǵanda memlekettiń 25 mlrd. teńgesi únemdeler edi. Búgin Senat otyrysynda derbes bilim berý uıymdarynyń qyzmetin retteý máselelerine arnalǵan zań jobasyn talqylaý barysynda senator Murat Baqtııaruly osyndaı pikir bildirdi.
«Bıylǵy mektep bitirgen oqýshylardyń 44 myńy Ulttyq biryńǵaı testileýge qatysqan joq. Al UBT-ǵa qatysqan 81 myń oqýshynyń 15 myńy, ıaǵnı árbir besinshi talapker 50 balldan tómen kórsetkishte bolyp otyr. Demek, bıylǵy oqý jylynda elimizdiń orta mektepterin bitirgen 125 myń oqýshynyń 60 myńyn, ıaǵnı árbir ekinshi oqýshyny toǵyzynshy synyptan keıin kásiptik oqýǵa baǵyttaı alǵanda6 memlekettiń 25 mlrd. teńgesin únemdegen bolar edik», - dedi senator.
Bul rette depýtat M. Baqtııaruly mınıstrliktiń orta bilim berý salasyn jan basyna qaraı qarjylandyrý máselesin kesheýildetip jatqanyn da synǵa aldy. Onyń paıymynsha, bul isti soza berýge de bolmaıdy.
Budan bólek, depýtat Bilim mınıstrliginiń kásiptik orta oqý oryndaryn bitirýshilerdiń joǵary oqý ornyna túsý úshin orta mektep baǵdarlamasy negizinde test tapsyrýy týraly sheshimine de syn aıtty. Onyń sózine qaraǵanda, orta mekteptiń baǵdarlamasy boıynsha pán sabaqtaryn kolledj oqýshylary qysqartylǵan túrde ǵana oqıdy. «Elimizde jyl saıyn kásiptik orta oqý oryndaryn 80 myńǵa jýyq oqýshy bitiredi. Olardyń basym bóligi joǵary oqý oryndaryna túsý úshin keshendi test tapsyrady. Sońǵy úsh jyl boıy kásiptik orta oqý orynyn bitirip, joǵary oqý ornyna túskisi kelgenderdiń 70 paıyzy keshendi testileýden óte almaǵan. Bul óskeleń urpaqqa jasap jatqan tájirıbe sekildi kórinedi», - dedi M. Baqtııaruly.
