Mektep bitirýshi synyptardaǵy oqý pánderiniń 70%-y dástúrli formatta oqytylady

NUR-SULTAN. QazAqparat - Oqý jylynyń úshinshi toqsany 20 naýryzǵa deıin jalǵasady. Buǵan deıin bastaýysh jáne besinshi synyp oqýshylary úshin ata-analardyń ótinishteri boıynsha kezekshi synyptarda kúndizgi oqý úshin jaǵdaı jasalǵan bolatyn. Endigi kezekte mektep bitirýshi synyptarǵa qatysty derbes sheshim qabyldandy, dep habarlaıdy QR BǴM baspasóz qyzmeti Telegram kanalynda.

Mektep bitirýshi synyptardaǵy oqý pánderiniń 70%-y mindetti túrde dástúrli formatta, al qalǵan 30%-qashyqtan oqytylatyn bolady. Mektepterde ıkemdelgen sabaq kesteleri jasalady. Kezekshi synyptardaǵy oqýshylardyń sany burynǵydaı 15 adamnan aspaýy qajet (máselen, eger synypta 25 oqýshy bolsa, onda synyp eki topqa bólinedi).

«Mektep bitirýshi synyp oqýshylarynyń ata-analary balalarynyń dástúrli formatta oqýyna ruqsat berýdi suraǵan bolatyn. Bul máseleni jergilikti jerlerdegi bas sanıtarlyq dárigerler retteıdi. Biraq mektep bitirýshi synyptardaǵy oqýshylar negizgi pánderdi mindetti túrde mektep qabyrǵasynda oqýlary tıis. Qandaı pánder dástúrli formatta oqylady, al qaısysy qashyqtan júrgiziletinin ár mekteptiń ákimshiligi ózi sheshedi. Sonymen qatar barlyq bilim berý uıymyna ádistemelik usynymdar joldandy. Bıylǵy oqý jylynda mektep bitirýshi synyp oqýshylarynyń sany 440 myńnan asatynyn atap ótkim keledi» , - dedi QR Mektepke deıingi bilim jáne orta bilim komıtetiniń tóraıymy Maıra Meldebekova.