Mektep bitirý keshi: arnaıy agenttikter men stýdııa jaldaýǵa aqsha jınaýǵa tyıym salynǵan

ASTANA. QazAqparat – Oqý-aǵartý vıtse-mınıstri Edil Ospanov bıyl mektep túlekteriniń bitirý keshin ótkizýine qatysty pikir bildirdi, dep habarlaıdy QazAqparat tilshisi.

«Búgin elimizdiń barlyq mektebinde sońǵy qońyraý saltanatty sharasy ótti. Mektep túlekteri ómiriniń mańyzdy sáti retinde bitirý keshin uıymdastyrýy múmkin. Ony ótkizý túlekter men olardyń ata-anasynyń erkinde. Alaıda atalǵan sharany ótkizýdiń birqatar erejesi bar ekenin umytpaǵan jón. Atap aıtqanda, sybaılas jemqorlyqtyń aldyn alý maqsatynda ata-analarǵa merekelik is-sharalardy uıymdastyrýda arnaıy agenttikterdi tartyp, stýdııa jaldaýǵa aqsha jınaýǵa tyıym salynǵan», - dedi Edil Ospanov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, mektep bitirý keshterin ótkizý boıynsha pedagogter men ata-analarǵa túsindirý jumysy júrgizildi.

«Sonymen qatar balalardyń qaýipsizdigin qamtý maqsatynda olardyń túngi ýaqytta oıyn-saýyq oryndarda bolýyna zańmen tyıym salynady. Ata-analary balalarymen birge bolyp, qadaǵalaý qajet. Balalardyń qaýipsizdigine ata-ana da, quzyrly organdar da barlyǵymyz jaýaptymyz», - deıdi mınıstrdiń orynbasary.