Mektep basshylarynyń zańsyz áreketteri adam ólimine soqtyrýda
ASTANA. 4 qarasha. QazAqparat /Aıdar Ospanalıev/ - «Elimizdegi keıbir bilim berý mekemelerindegi basshylardyń zańsyz áreketteriniń sońy mekeme qyzmetkerleriniń aýyr jaraqattar alýyna, tipti adam ólimine alyp kelip soqtyrýda», - deıdi Bas prokýratýranyń resmı ókili Jandos Ómirálıev. Bul týraly ol búgin jýrnalıstermen bolǵan brıfıngte málim etti.
Resmı ókildiń sózine qaraǵanda, Aqtóbe oblysynda mektep basshysynyń óz ujymynda eden jýýshy bolyp jumys isteıtin eki áıel azamatshany zańsyz túrde jóndeý jumystarymen aınalysýǵa májbúrleýdiń saldarynan eki áıel de osy jumystar barysynda kóz jumdy. Osy ýaqytta atalmysh fakti boıynsha qylmystyq is qozǵalyp, ol boıynsha tergeý amaldary jalǵasýda. «Tehnıkalyq qyzmet kórsetetin azamattardyń jóndeý jumystary barysynda aýyr jaraqat alý jaǵdaılary Qostanaı jáne Batys Qazaqstan oblystarynda da oryn aldy. Qostanaı oblysynda Kıev orta mektebiniń ustazdary kezekti eńbek demalystarynan qaıta shaqyrylyp, jóndeý jumystarymen aınalysýǵa májbúr bolǵan. Al bul eńbek zańnamasyn óreskel túrde buzý. Bul ustazdar tipti jóndeý jumystaryn qoıyp, terezelardiń qańqalaryn aýystyrý, kirpish qalaý, qabyrǵany ákteý sııaqty jumystardy da atqarǵan», dedi resmı ókil.
Onyń derekteri boıynsha, Almaty, Jambyl, Pavlodar, Aqmola, Ońtústik Qazaqstan, Qostanaı, Aqtóbe, Atyraý oblystarynda ata-analar men mektep oqýshylaryn jóndeý jumystaryna tartý jaǵdaılary oryn alǵan. «Al Ekibastuzdaǵy mektepterdiń birinde oqýshylardan synyptardy jóndeý úshin 200 teńge jáne odan da kóp kólemde qarjy jınaý tapsyrylǵan. Al belgilengen qarjyny ótkize almaǵan oqýshylardyń ata-analary mektepti jóndeý jumystaryna tartylǵan», - dedi J.Ómirálıev.
Osy tektes zań buzýshylyqtar jóninde 47 prokýrorlyq qadaǵalaý aktisi engizilip, Úkimetke oryn alǵan kemshilikterdi joıý jóninde usynys túsirilgen. Sondaı-aq atalmysh usynysta jergilikti atqarýshy organdar ókilderine mektepterge jetkilikti mólsherde qarjy qarastyrý qajettigi kórsetilgen. Sebebi kóptegen mektepter qarjynyń jetispeýshiliginen jóndeý jumystaryn ózderiniń kúshimen júrgizýge májbúr.
