Mektep baspaldaǵynan qulap, komaǵa túsken oqýshy esin jınady
ÓSKEMEN. QazAqparat - Dárigerler ShQO Zyrıanov aýdanyndaǵy mektepte baspaldaqtan qulaǵan balanyń jaǵdaıy týraly aıtty, dep habarlaıdy «QazAqparat» HAA tilshisi.
«Toǵyz jastaǵy mektep oqýshysynyń jaǵdaıy turaqtaldy, bala komadan shyqty, suraqtardy túsinip, aıaq-qolynyń saýsaqtaryn qozǵalta alady», - dedi QazAqparatqa Ortalyq aýdandyq aýrýhananyń bas dárigeri Vladımır Korobkın.
Eske salaıyq, Zyrıanovtaǵy № 1 mekteptiń bastaýysh synybynda bilim alyp jatqan úshinshi synyp oqýshysy sabaq aıaqtalǵannan keıin baspaldaqpen túsip bara jatyp, birinshi jáne ekinshi qabattyń aralyǵynan qulap ketken. Oǵan balalar, ulyn alyp ketýge kelgen ákesi men mektep medbıkesi júgirip kelip, jedel járdem shaqyrǵan. Bala esin bilip, jylaǵan, keıin komaǵa túsken.
Bas dáriger Vladımır Korobkınniń aıtýynsha, mektep oqýshysyn aýrýhanaǵa eki kún buryn jatqyzyldy.
«Bala 2-shi dárejeli komada bolǵan. Onyń jaǵdaıy turaqty bolmaǵandyqtan, oblystyq ana men bala ortalyǵyna shuǵyl jetkizý múmkin bolmady. Sondyqtan Óskemennen arnaıy bilikti maman shaqyrtyldy», - dep túsindirdi ol.
Vladımır Korobkın QazAqparat tilshisine jaýap bere otyryp, balanyń qulap jatyp, jelkesin uryp alǵanyn málimdedi.
Zyrıanov aýdandyq bilim bóliminiń habarlaýynsha, oqıǵanyń mán-jaıyn anyqtaý úshin arnaıy komıssııa qurylǵan.
