Mektep baspaldaǵynan qulaǵan balaǵa Astana dárigerleri 29 mınýtta jetken

Astana ákimdigi mektep baspaldaǵynan qulap, mertikken balaǵa jedel járdem kóligi nelikten jarty saǵatqa jýyq júrip barǵanyna túsinik berdi, dep habarlaıdy QazAqparat tilshisi.

«18 qyrkúıek kúni «103» pýltine Máskeý, 23 mekenjaıynda ornalasqan №14 orta mektepten shuǵyldyǵy 3-sanatty shaqyrtý (jedel járdemniń jetken ýaqyty – 29 mınýt) tústi. Patsıent statsıonarǵa aldyn ala habarlandyrý arqyly №2 kópbeıindi qalalyq balalar aýrýhanasyna jatqyzyldy jáne medıtsınalyq alǵashqy kómek tolyq kólemde kórsetildi. Aýrýhanaǵa túsken kezde barlyq mamandar qarady», – dep atap ótedi Astana qalalyq qoǵamdyq densaýlyq saqtaý basqarmasynan.

Oqýshy qazirgi ýaqytta neırohırýrgııanyń beıindi bólimshesinde em alyp jatyr.

«Jalpy jaǵdaıy aýyrlyqtyń ortasha deńgeıinde, jaqsarý dınamıkasy bar. Bas súıek-mı jaraqaty hattamasy boıynsha em alyp jatyr. Qazirgi ýaqytta jedel emdeýdi qajet etpeıdi», – dedi basqarmadan.

Buǵan deıin Astanada oqýshy mektep baspaldaǵynyń ekinshi qabat deńgeıinen qulap ketkenin jazǵan bolatynbyz. Áleýmettik jelidegi pablıkterde bala shet elde shuǵyl emdi qajet etetini jazylǵan edi.